Beynəlxalq Mülki Müdafiə Təşkilatının Baş Məclisinin qərarı ilə 1972-ci ildən etibarən, hər il martın 1-i bu təşkilata üzv olan bütün ölkələrdə “Ümumdünya Mülki Müdafiə Günü” kimi qeyd olunur. Hazırda Beynəlxalq Mülki Müdafiə Təşkilatına dünyanın 100-dən çox ölkəsi daxildir. Bu təşkilatın əsas məqsədi dünya əhalisinin mühafizəsi sahəsindəki təcrübəni ümumiləşdirib yayılması, Mülki Müdafiə kadrlarının hazırlanması və təkmilləşdirilməsi, habelə təbii fəlakətlər və iri qəzalar zamanı dövlətlərarası qarşılıqlı yardımın təşkil edilməsindən ibarətdir. Azərbaycan Respublikası da 1993-cü ildən bu nüfuzlu humanitar təşkilatın üzvlüyünə qəbul edilmiş və onun keçirdiyi bütün tədbirlərdə fəal iştirak edir.
Hər il olduğu kimi 1 mart 2018-ci il "Ümumdünya Mülki Müdafiə Günü" “Ekol Mühəndislik Xidmətləri” QSC-də də qeyd olunmuş, bu əlamətdar gün münasibətilə kollektivin iştirakı ilə toplantı keçirilmişdir. Nizami və Xətai rayon Fövqəladə Hallar və Mülki Müdafiə şöbəsinin təsdiq etdiyi tədbirlər planına uyğun olaraq, QSC- nin bütün xidmət sahələrinə bu tədbir barədə xəbərdarlıq rabitə vasitəsilə çatdırılmış, foto sərgilər təşkil olunmuş və MM manqaları ilə birgə toplantılar keçirilmişdir. Toplantıda Baş direktorun SƏTƏM üzrə müavini Eldəniz Həsənli, Baş direktorun Ümumi işlər üzrə müavini İsrafil Əliyev, Həmkarlar Komitəsinin sədri Əli Ələkbərov, Texniki təhlükəsizlik şöbəsinin rəisi Səbuhi Veysəlov və Manqa komandirləri tədbirdə çıxış edərək, Mülki Müdafiənin insanların həyatındakı rolundan ətraflı danışmış və bu sahəyə cavabdeh şəxslərin daha da məsuliyyətli olmaları tövsiyə edilmişdir. Mülki Müdafiə üzrə mühəndis Fuad İmanov QSC-də Mülki Müdafiə üzrə görülən işlər və qarşıda duran vəzifələr barədə tədbir iştirakçılarına geniş məlumat vermişdir. Sonra MM sahəsinə aid sərbəst mövzularda geniş müzakirələr aparılmışdır.
tarix : 02.03.2018
|