QSC-nin Tullantıların emalı departamenti sənaye çirkab sularının təmizlənməsi, neftşlamın emalı və zərərsizləşdirilməsi proseslərini mexaniki və avtomatlaşdırılmış qurğu və mexanizmlər vasitəsi ilə həyata keçirir. İstismarda olan bu qurğu və mexanizmlərin fasiləsiz işinin təmin edilməsi üçün təmir və texniki nəzarət işlərinin vaxtlı-vaxtında yerinə yetirilməsi böyük əhəmiyyət kəsb edir. Bu məqsədlə QSC -də Elektromexaniki təmir sexi fəaliyyət göstərir. Sex lazımı avadanlıqlar və nəqliyyat vasitəsi ilə təmin olunmuşdur. Sexdə peşəkar mütəxəssislər çalışır.
       Sex istehsalat sahələrində elektrik və qazanxana təsərrüfatına texniki nəzarət və təmir xidmətləri göstərir. Bu işlərin yerinə yetirilməsi üçün sexin elektrik montyoru, çilingər və ocaqçılardan ibarət briqadaları fasiləsiz olaraq istehsalat sahələrində 110 - 200 kvt gücündə olan nasosların, elektrik avadanlıqlarının, mexanizmlərin və qazanxanaların iş rejiminə nəzarət edir təmir işlərini yerinə yetirirlər.
       Elektromexaniki təmir sexinin daxili imkanlardan istifadə edilərək, Parafin xətti və təmizləmə qurğusu, 2 ədəd şlam emal edən dekantor qurğusu quraşdırılmış və istismara verilmişdir. 55 N-li elektrik yarımstansiyasına 6 kv-luq gərginlik kabeli çəkilmiş və yarımstansiyanın işi bərpa edilmişdir. Yeni su təmizləyici "Faset" qurğusunun quraşdırılmasında sexin işçiləri fəal iştirak etmişlər.
       Sexin potensial imkanlarından istifadə edilərək, istehsalat sahələrində olan qazanxanalarda və elektrik təsərrüfatında yenidənqurma işlərinin görülməsi planlaşdırılır.