Qeyd olunduğu kimi, 2010 cu ilin "Ekologiya İli" olması ilə əlaqədar, cari ilin dekabr ayından QSC təsdiq olunmuş tədbirlər planına uyğun bir sıra ekoloji layihələrin icrasına başlamış, növbəti ildə bu tədbirlərin daha da genişləndirilməsi üçün hazırlıq işləri görülmüşdür.
Hazırda QSC-nin bu istiqamətdə apardığı layihələrdən biri də ARDNŞ-nin Ekologiya İdarəsinin balansında olmuş və ilin sonunda xidməti məqsədlər üçün QSC -nə verilmiş Suraxanı rayonu, Zığ qəsəbəsi, Hövsan yolu ünvanda yerləşən qeyri-yaşayış sahəsinin əsaslı təmiri, rekonstruksiyası, abadlaşdırılması və ərazinin yaşıllaşdırılmasıdır.
"Ekol Mühəndislik Xidmətləri" QSC öz daxili imkanları hesabına artıq bu sahədə xeyli işlər görmüş, ardıcıl keçirilən iməciliklərdə ərazidə yüzlərlə ağac və bəzək kolları əkilmişdir.
Dekabrın 26-da QSC-nin həmin sahədə növbəti iməciliyi keçirilmiş, 200-ə qədər əməkdaş tədbirdə iştirak etmişdir. Bu iməcilikdə əlavə olaraq 200-ə qədər müxtəlif növ ağac, 200-ə qədər isə bəzək kolları əkilmişdir.
Ağacəkmə aksiyasında ARDNŞ-nin prezidenti Rövnəq Abdullayev və digər rəsmi şəxslər də iştirak etmişlər. Şirkətin prezidenti R.Abdullayev ərazidə xatirə ağacı əkmişdir.
QSC-nin baş direktoru Soltan Əliyev ARDNŞ-nin prezidentinə və KİV-nə bu sahənin perspektiv planları barədə məlumat vermişdir. O, qeyd etmişdir ki, gələcəkdə bu sahədə alternativ enerji ilə işləyən lampaların istehsal olunması və dibçək güllərinin yetişdirilməsi işləri həyata keçiriləcəkdir. Eyni zamanda ərazidə nümunəvi yaşıllıq zolaqları salınacaqdır.
Bütün bunlarla əlaqədar olaraq Şirkətin Prezidenti Rövnəq Abdullayev fikirlərini bildirmiş, keçirilən ağacəkmə aksiyalarını təqdirəlayiq hesab edərək əlavə tapşırıqlarını vermişdir.

tarix : 26.12.2009