Azərbaycan Respublikası öz müstəqilliyinə qovuşduqdan sonra ekoloji problemlərin həlli məsələlərinə diqqət xeyli dərəcədə artırılmış, ulu öndər Heydər Əliyev tərəfindən qoyulmuş bu ənənə, bu gün də ölkə Prezidenti İlham Əliyev tərəfindən uğurla davam etdirilir və respublikamızın ekoloji durumunun yaxşılaşdırılmasına xüsusi önəm verilir. Prezident İlham Əliyevin müvafiq tövsiyə və tapşırıqlarına uyğun olaraq indi nəinki Abşeron yarımadasında, eyni zamanda Azərbaycanın hər bir rayonunda ekoloji vəziyyətin yaxşılaşdırılması və yaşıllıqların salınması işlərinin geniş vüsət aldığını görürük.

ARDNŞ də respublikamızda neft sənayesinin inkişafı ilə yanaşı fəaliyyətinin bir istiqamətini ötən əsrdən miras qalmış ekoloji problemlərin həllinə və çirklənmiş ərazilərin bərpasına yönəltmişdir. Ötən dövr ərzində ARDNŞ öz sərəncamında olan ərazilərdə süni göllərin, neftlə çirklənmiş torpaqların , lay suları altında qalmış və istehsalat tullantıları ilə çirklənmiş sahələrin ekoloji vəziyyətinin yaxşılaşdırılması, eləcə də, yaşıllıqların salınması istiqamətində böyük sürətlə geniş layihələr həyata keçirmiş, hazırda da bu işlər yüksək templə davam etdirilir.

Ekoloji yönümlü layihələrin həyata keçirilməsində ARDNŞ-nin potensial podratçısı olan, Şirkətin təsisçiliyi ilə yaradılmış (51%) “Ekol Mühəndislik Xidmətləri” QSC də 2006-cı ildən başlayaraq ekoloji layihələrin icra olunmasında öz layiqli töhfələrini vermişdir.

2010-cu ildə də“Ekologiya İli” çərçivəsində ARDNŞ-nin həyata keçirəcəyi bir çox ekoloji layihələrin icrası “Ekol Mühəndislik Xidmətləri” QSC-nə həvalə edilmişdir. Bunlara Z.Tağıyev adına NQÇİ-nin (Qala qəsəbəsi) və “Siyəzənneft” NQÇİ-nin mədən ərazilərində bioremediasiya işlərinin aparılması, Sabunçu rayonunun ərazisində olimpiya stadionunun tikintisi üçün ayrılmış sahənin çirkab sulardan və neft tullantılarından təmizlənməsi, rekultivasiyası və s. bu kimi mühüm layihələr aiddir.

Artıq ARDNŞ-nin “Azneft” İB və Sosial İnkişaf İdarəsi ilə müqavilələr imzalanmış, cari ilin yanvar ayından layihə-smeta sənədləri əsasında layihələrin icrasına başlanılmışdır.

QSC layihələrin vaxtında və yüksək keyfiyyətlə icra olunması üçün mövcud güclü maddi-texniki bazasından və texniki imkanlarından istifadə etməklə yanaşı, əlavə olaraq daha müasir və güclü texnikaların, qurğuların alınması istiqamətində məqsədyönlü tədbirlər görür.

tarix : 10.02.2010