Fevralın 18-də ARDNŞ-nin Baş ofisində neftlə çirklənmiş torpaqların və suların təmizlənməsi üçün Elmlər Akademiyasının elmi-tədqiqat institutlarının, təcrübi-istehsalat konstruktor bürolarının hazırladıqları layihələrin təqdimatı ilə bağlı geniş toplantı keçirilmişdir. Toplantıda ARDNŞ-nin mütəxəssisləri, Ekologiya İdarəsinin, “Azneft” İB-nin, Birgə Müəssisə və Əməliyyat Şirkətlərinin iştirak etmişlər.
Tədbirdə “Ekol Mühəndislik Xidmətləri” QSC-ni Baş direktor Soltan Əliyev, Ekoloji monitorinq departamentinin (EMD) rəisi Şahabiddin Albuşov, EMD-nin Səyyar monitorinq xidmətinin rəisi Maqsud Babayev təmsil etmişlər.
Toplantıda “Ekologiya İli” ilə əlaqədar olaraq 2010-cu ildə həyata keçiriləcək layihələr, neftlə çirklənmiş torpaqların və suların təmizlənməsi üçün elmi-tədqiqat institutlarının və konstruktor bürolarının hazırladıqları təmizləyici avadanlıqlar və təmizləmə üsulları, eləcə də, təqdim olunan digər təkliflər geniş müzakirə olunmuşdur.
ARDNŞ-nin ekologiya üzrə vitse-prezidenti Muxtar Babayev çıxış edərək bildirmişdir ki, neftlə çirklənmiş torpaqların və suların təmizlənməsi üçün Şirkət hər zaman mükəmməl avadanlıqlardan istifadə etmiş, gələcəkdə də müasir avadanlıqlar və texnologiyalardan istifadə etməyi qarşısına məqsəd qoymuşdur.
M.Babayev ARDNŞ-nin bütün qurumlarının nümayəndələrinə təqdim olunan layihələrlə yaxından tanış olmalarını və müvafiq təkliflərini təqdim etmələrini tövsiyə etmişdir.
tarix : 22.02.2010
|