Respublika Prezidentinin “Sağlam ekoloji mühit, sağlam hava, təmiz su” çağırışını ekoloji layihələrdə konseptual əsas kimi rəhbər tutan Dövlət Neft Şirkəti 2006-cı ildən başlayaraq torpaqların təmizlənməsi və yaşıllıqların salınması layihələrinin icrasına yeni təkan vermişdir.

       Ötən illər ərzində Bibiheybət, Balaxanı, Siyəzən, Kürovdağ, Qaradağlı və digər yataqlarda 300 hektara qədər torpaq sahəsi çirklənmədən təmizlənmiş və yaşıllıqlar salınmışdır. Bibiheybətdə təmizlənmiş ərazidə 80 minə yaxın ağac əkilmişdir. Ümumilikdə ötən üç il ərzində neft mədənlərinin təmizlənmiş ərazilərində 120 mindən çox ağac əkilmiş və onlara mütəmadi olaraq aqrotexniki qulluq göstərilmişdir. Bu işlərin yerinə yetirilməsində “Ekol Mühəndislik Xidmətləri” QSC də yaxından iştirak etmişdir.

       “Ekologiya İli” elan olunmuş 2010-cu ildə isə ARDNŞ tərəfindən mədən ərazilərində 150 min ağac, 16 min gül və bəzək kollarının əkilməsi nəzərdə tutulur. Çirklənmədən təmizlənmiş mədən ərazilərində salınmış yaşıllıqlara mütəmadi aqrotexniki xidmətlərin göstərilməsi isə vacib şərtlərdən biridir.

       Bununla əlaqədar olaraq, fevral ayında “Azneft” İstehsalat Birliyi ilə “Ekol Mühəndislik Xidmətləri” QSC arasında “Azneft” İstehsalat Birliyi “28 may” NQÇİ-nin Çilov adası və “Bibiheybətneft” NQÇİ-nin əkin ərazilərində yaşıllıqlara qulluq edilməsi” barədə müqavilə imzalanmışdır. Bu məqsədlə QSC-nin Torpaqların rekultivasiyası departamentinin nəzdində yaşıllaşdırma üzrə yeni bir sahə yaradılmış, bu sahəyə təcrübəli aqronomlar və bağbanlar cəlb edilmişdir. Yaxın zamanda sahə xüsusi texnika, avadanlıq və gübrələrlə təchiz olunacaqdır.

       Gələcəkdə ARDNŞ-nin “Maye-Qaz” Emalı Zavodunun və bir çox digər müəssisələrinin ərazilərindəki yaşıllıqlara aqrotexniki xidmət göstərilməsi də “Ekol Mühəndislik Xidmətləri” QSC-nə həvalə edilməsi nəzərdə tutulur.

 

 

 

Futzal

Alternativ Enerji

Bu maraqlıdır

• İnsan ildə 1-1,5 ton, gündə isə 0,86 kq oksigen istifadə...