Bakı Biznes Mərkəzində “Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı”nın icrasının birinci ilinin yekunlarına həsr olunmuş konfrans-sərgi keçirilmişdir.
Azərbaycan Respublikasının Prezidenti İlham Əliyev martın 12-də Dənizkənarı Milli Parkda inşa edilmiş Bakı Biznes Mərkəzinin açılışında və burada təşkil olunmuş konfrans-sərgidə iştirak etmişdir. Ölkə başçısına son illərdə, o cümlədən 2009-cu ildə regionların sosial – iqtisadi inkişafı, ölkənin enerji, ərzaq və ekoloji təhlükəsizliyinin daha da möhkəmləndirilməsi istiqamətində əldə edilən nailiyyətləri əks etdirən sərgi barədə məlumat verilmişdir.
Yüksək səviyyəli beynəlxalq tədbirlərin, o cümlədən biznes-forumların təşkil olunması üçün nəzərdə tutulan, Dənizkənarı Milli Parka əlavə yaraşıq gətirən, müasir üslubda inşa edilmiş Bakı Biznes Mərkəzində təşkil olunmuş sərgidə, respublikamızın müxtəlif regionlarının kənd təsərrüfatı, sənaye, yeni istehsal və xidmət müəssisələrinin, infrastruktur obyektlərinin, eləcə də ekologiya sahələrinin məhsulları, eksponatları və stendləri nümayiş etdirilmişdir.
2010-cu il “Ekologiya İli” ilə əlaqədar sərginin Ekologiya portalında Azərbaycan Respublikası Ekologiya və Təbii Sərvətlər Nazirliyi, Azərbaycan Respublikası Dövlət Neft Şirkəti və Təmiz Şəhər ASC təmsil olunmuşlar.
ARDNŞ-nin Ekologiya İdarəsinin və “Ekol Mühəndislik Xidmətləri” QSC-nin yüksə səviyyədə tərtib və nümayiş etdirdiyi stendlər, laboratoriya avadanlıqları, nümunələr, elektron məlumat bazası və video çarxlar sərgi iştirakçılarında xüsusi maraq doğurmuşdur. Sərgidə iştirak edən ölkə başçısı İlham Əliyev ekologiya portalı ilə maraqlanmış, ARDNŞ-nin sərgi eksponatlarını və stendlərini diqqətlə nəzərdən keçirmişdir.
Bakı Biznes Mərkəzində təşkil olunmuş sərgi martın 19-dək davam edəcəkdir.
tarix : 16.03.2010
|