Respublikamızın hər yerində yeni həyat gətirən, qəlbləri sevindirən, ətrafı gözəlləşdirən, təbiəti oyadan, bayramların ən seviləni olan Novruz bayramı böyük təntənə ilə qeyd olunur.
“Ekol Mühəndislik Xidmətləri” QSC-nin kollektivi də Novruz bayramının təntənəli qeyd olunması məqsədilə geniş ziyafət təşkil etmişdir. Ziyafətə kollektivin 300 nəfərdən artıq nümayəndəsi qatılmışdır.
Xüsusi Ssenari əsasında bədii-musiqili tərtibatda təşkil olunmuş ziyafəti giriş sözü ilə açan “Ekol Mühəndislik Xidmətləri” QSC-nin baş direktoru Soltan Əliyev, ziyafət iştirakçılarını Novruz bayramı münasibəti ilə təbrik etmiş, insanların sağlamlığına və ekoloji vəziyyətin yaxşılaşdırılmasına xidmət edən şərəfli əmək fəaliyyətlərində onlara müvəffəqiyyətlər arzulamışdır.
Maraqlı əyləncəli proqramla keçirilən ziyafətdə QSC-nin rəhbər heyətinin hər biri ayrı-ayrılıqda çıxış edərək kollektivi Novruz bayramı münasibəti ilə təbrik etmişlər.
Novruzun kosa və keçəl personajlarının tədbirə qatılması, “Ekol”un xüsusi geyimində olan ofisiantların yüksək səviyyəli xidməti ziyafət iştirakçılarında xoş əhval-ruhiyyə yaratmışdır. Kosa və keçəl iştirakçılarla ənənəvi yumurta döyüşdürmə yarışları keçirmiş və qaliblərə hədiyyələr təqdim olunmuşdur. Ziyafətdə ad günləri Novruz günlərinə təsadüf edən kollektivin bir neçə üzvü təbrik edilmiş və onlara xüsusi hədiyyələr verilmişdir.
Milli musiqi və rəqslərlə müşayiət olunan ziyafət 5 saata qədər davam etmişdir.
tarix : 18.03.2010
|