Öz ətrafında işgüzar qurumları birləşdirən Xəzər-Avropa İnteqrasiya İşgüzar Klubunun (Caspian İntegration Business Club) təşkilatçılığı ilə aprelin 02-də “Buta Palace” Konsert – Banket Kompleksində “Caspian Energy İntegration Award – 2010” mükafatının təqdimat mərasimi keçirilmişdir.
Tədbirdə Azərbaycan Respublikasının Milli Məclisinin, nazirlər Kabinetinin, Nazirliklərin, ARDNŞ-nin məsul işçiləri, xarici ölkələrin səfirliklərinin və mötəbər təşkilatların nümayəndələri iştirak etmiş, mükafat alanların şərəfinə ziyafət və konsert proqramı təşkil olunmuşdur.
Mükafat sahiblərini müəyyənləşdirmək üçün təkcə Azərbaycanda deyil, dünyanın bir çox menecerləri arasında sorğu aparılmış, çoxsaylı respondentlərin rəyinə görə qaliblər müxtəlif nominasiyalarda mükafata layiq görülmüşlər.
“Ekol Mühəndislik Xidmətləri” QSC isə 2010-cü “Ekologiya İli”ndə həyata keçirdiyi aktual ekoloji layihələrə və Respublikamızın ekoloji vəziyyətinin yaxşılaşdırılmasına verdiyi layiqli töhfələrə görə “İlin Ekologiya Şirkəti” nominasiyası üzrə “Caspian Energy İntegration Award – 2010” mükafatına layiq görülmüşdür. ARDNŞ-nin “Azneft” İstehsalat Birliyi, Heydər Əliyev adına BNEZ və bir neçə Birgə Müəssisələri də mükafat alanların sırasında olmuşdur.
Mükafatı ARDNŞ-nın müəssisə və təşkilatlarına təqdim edən Şirkətin vitse - prezidenti Muxtar Babayev onları mükafat almaları münasibəti ilə təbrik etmiş və gələcək fəaliyyətlərində uğurlar arzulamışdır.
Mükafatı alan “Ekol Mühəndislik Xidmətləri” QSC-nin baş direktoru Soltan Əliyev, onların əməyinə verilən yüksək qiymətə və göstərilən etimada görə təşkilatçılara öz minnətdarlığını bildirmiş və QSC-nin bundan sonra da respublikamızda ekoloji vəziyyətin yaxşılaşdırılması sahəsində uğurlu və səmərəli fəaliyyət göstərəcəyini qeyd etmişdir. Xatırladaq ki, “Ekol Mühəndislik Xidmətləri” QSC 2009-cu ildə də ətraf mühitin mühafizəsi sahəsində göstərdiyi xidmətlərə görə “Caspian Energy İntegration Award – 2009” mükafatına layiq görülmüşdür.
Qeyd edək ki, “Caspian Energy İntegration Award” beynəlxalq mükafatı 2002-ci ildə təsis edilib. 2005-ci ildə mükafatın ilk təqdimetmə mərasimi keçirilib. Bu mükafat Xəzər-Qaradəniz və Baltikyanı region ölkələrinin siyasi və ictimai xadimlərinə, iş adamlarına təqdim olunur. İndiyədək mükafatın sahibləri arasında ümummilli lider Heydər Əliyev, Azərbaycan Prezidenti İlham Əliyev, Qazaxıstan Prezidenti Nursultan Nazarbayev də olub.
tarix : 05.04.2010
|