Mayın 10-da “Ekol Mühəndislik Xidmətləri” QSC-nin rəhbərliyi və kollektivin təmsilçiləri Ulu öndərimiz Heydər Əliyevin anadan olmasının 87-ci ildönümü ilə əlaqədar, Ümummilli Liderin Bakı Neft Emalı Zavodunun ərazisindəki abidəsi önünə əklil və tər çiçəklər düzmüş, onun əziz xatirəsini ehtiramla yad etmişlər. Tədbir QSC-nin O.Vəliyev küçəsi -1 ünvandakı ofisində Ulu öndərin 87-ci ildönümünə həsr olunmuş toplantı ilə davam etmişdir.
Toplantını “Ekol Mühəndislik Xidmətləri” QSC-nin baş direktoru Soltan Əliyev giriş sözü ilə açaraq, bütün həyatını xalqına həsr etmiş Ümummilli Lider Heydər Əliyevin müstəqilliyimizin əldə edilməsi, suverenliyimizin qorunub saxlanılması, respublikamızın iqtisadi qüdrətinin yüksəldilməsi istiqamətində gördüyü işlərdən, onun həyatımızın bütün sahələrindəki çoxtərəfli fəaliyyətindən və əsasını qoyduğu neft strategiyasının ölkəmizə qazandırdığı uğurlardan ətraflı bəhs etmişdir. QSC-nin baş direktoru qeyd etmişdir ki, Azərbaycan xalqı və müstəqil dövlətimiz yaşadıqca, Heydər Əliyevin ideya və əməlləri daim yaşayacaqdır. O, Ulu öndərin siyasi kursunun Azərbaycan Respublikasının Prezidenti İlham Əliyev cənablarının rəhbərliyi altında uğurla davam etdirildiyini xüsusilə vurğulamışdır.
Hazırda QSC-də baş direktorun məsləhətçisi vəzifəsində çalışan, Heydər Əliyevin birinci hakimiyyəti dövründə Neft-kimya Sənayesi naziri vəzifəsində işləmiş Kamil Akimov çıxış edərək Ulu öndər haqqında öz xatirələrini danışmış, onun Azərbaycanın neft sənayesinin inkişafındakı fövqəladə rolunu toplantı iştirakçılarının diqqətinə çatdırmışdır.
Toplantıda çıxış edən baş direktorun ümumi işlər üzrə müavini Ramil Əliyev, YAP “Ekol” ilk ərazi təşkilatının sədri Fəxrəddin Quliyev milli dövlətçiliyimizin, müstəqilliyimizin əbədiliyinin qarantına çevrilmiş yeni neft strategiyasının banisi, suveren Azərbaycan dövlətinin qurucusu və memarı, fenomen şəxsiyyət Heydər Əliyevin unudulmaz xatirəsinin daim ürəklərdə yaşayacağını, Ulu öndərin ideyalarının həyata keçirilməsi, respublikamızın iqtisadi qüdrətinin yüksəldilməsi və daha da çiçəklənməsi naminə layiqli töhfələr verilməsinin hər bir kəsin vətəndaşlıq və mənəvi borcu olmasını xüsusilə qeyd etmişlər.
Tədbir iştirakçıları Ulu öndərə hörmət və ehtiram əlaməti olaraq bir daha onun ruhu qarşısında baş əymiş, ona Ulu Tanrıdan rəhmət diləmişlər.
Nə qədər ki, müstəqil Azərbaycan dövləti var, Azərbaycan xalqı var Heydər Əliyev ürəklərdə yaşayacaqdır.
tarix : 11.05.2010
|