Ətraf mühitin mühafizəsi məsələlərinin  daim diqqət mərkəzində saxlanılması, respublikamızın ekoloji vəziyyətinin yaxşılaşdırılması üçün  ictimaiyyətin     səylərinin  birləşdirilməsi ideyalarının təbliğ olunması, gənclərin və yeniyetmələrin  ekoloji maarifləndirilməsi və təbiətə məhəbbət ruhunda tərbiyə edilməsi məqsədilə, Azərbaycandakı Amerika Ticarət Palatasının və “Ekol Mühəndislik Xidmətləri” QSC-nin təşkilatçılığı ilə Bakı şəhəri məktəblərində ekoloji maarifləndirmə tədbirlərinə başlanılmışdır.

    İlk tədbir mayın 12-də Bakının 20 saylı məktəbində həyata keçirilmişdir. Öncə iştirakçılara bu layihənin məqsədi və təşkilatçıların fəaliyyəti haqqında geniş məlumat verilmişdir. Tədbirdə Azərbaycandakı Amerika Ticarət Palatasının və “Ekol Mühəndislik Xidmətləri” QSC-nin rəhbər işçiləri, mütəxəssislər, məktəbin müəllim heyəti və şagirdləri iştirak etmişlər.

    QSC-nin Ekoloji monitorinq departamentinin   “Səyyar monitorinq xidməti” nin rəisi Maqsud Babayev  şagirdlərə ekoloji anlayışlar, respublikamızın ekoloji durumu və təbii ehtiyatları, tullantıların idarə olunması və təbii ehtiyatlardan səmərəli istifadə edilməsi mövzusunda əyani prezentasiya təqdim etmişdir. Prezentasiya şagirdlər tərəfindən maraqla dinlənilmiş, onların suallarına ətraflı cavab verilmişdir.

    Sonda  şagirdlərə “Ekol Mühəndislik Xidmətləri” QSC-nin rəmzi hədiyyələri təqdim olunmuş və xatirə şəkili çəkilmişdir.

     Xatırladaq ki, növbəti günlərdə belə tədbirlərin Bakının Z.Əliyeva adına liseydə, “SOS – uşaq kəndi internat məktəbində, 23 və 6 saylı məktəblərində də keçirilməsi nəzərdə tutulmuşdur.

tarix : 13.05.2010