Son illərdə Dövlət Neft Şirkətinin beynəlxalq aləmdə və ölkə daxilində fəaliyyət istiqamətləri genişləndikcə, Şirkət böyüyüb inkişaf etdikcə onun strukturu da təkmilləşdirilir.
Bunu nəzərə alaraq, Azərbaycan Respublikasının Prezidenti ARDNŞ-nin idarəetmə strukturunda neftin, qazım hasilatı və nəqli üzrə vitse – prezident ştatının yaradılmasına qərar vermişdir. Dövlət başçısının 12 may 2010-cu il tarixli Sərəncamı ilə bu vəzifəyə Rəhman Qurbanov təyin olunmuşdur. Ölkə Prezidentinin eyni tarixli başqa bir Sərəncamı ilə Soltan Tərlan oğlu Əliyev isə ARDNŞ-nin ekologiya üzrə vitse-prezidenti təyin edilmişdir.
Bununla əlaqədar olaraq mayın 14-də ARDNŞ-nin yeni təyin olunmuş vitse-prezidentlərinin təqdim olunma mərasimi keçirilmişdir. Mərasimdə şirkətin prezidenti Rövnəq Abdullayev çıxış edərək son illərdə ARDNŞ-nin əldə etdiyi uğurlardan, qazandığı nailiyyətlərdən, həyata keçirdiyi sosial – iqtisadi, ekoloji layihələrdən danışmışdır.
Daha sonra Rövnəq Abdullayev Şirkətə yeni təyin edilmiş vitse-prezidentləri mərasim iştirakçılarına təqdim edərək, onların ARDNŞ-nin kollektivi arasında böyük nüfuza malik yüksək səviyyəli rəhbər kadrlar olduqlarını vurğulamış, yeni vitse – prezidentləri təbrik edərək onlara gələcək fəaliyyətlərində uğurlar arzulamışdır.
Mərasimdə yeni təyin edilmiş vitse – prezidentlər Rəhman Qurbanov, Soltan Əliyev onlara göstərilən böyük etimada görə ölkə rəhbərliyinə minnətdarlıqlarını bildirmiş və bu etimadı əməli işləri ilə doğruldacaqlarını bildirmişlər.
Xatırladırıq ki, Soltan Tərlan oğlu Əliyev 1965-ci ildə anadan olmuş, 1992-ci ildə Azərbaycan Politexnik İnstitutunu bitirmişdir. Əmək fəaliyyətinə fəhlə kimi başlamışdır. Müxtəliv idarə və müəssisələrdə fəaliyyət göstərən Soltan Əliyev 2002-ci ildə ARDNŞ-nin strukturunda çalışmağa başlamışdır. “Azneft” İB-nin “Xəzərdənizneftqaztikinti” Trestində mühəndis, Trestin Dəmir-beton məmulatları zavodunun baş mühəndisi, “Azinteroyl” Birgə Müəssisəsinin baş direktoru, Heydər Əliyev adına BNEZ-da şöbə rəisinin müavini, “Məişət Maye Qaz” ASC-nin İdarə Heyətinin sədri vəzifələrində uğurla çalışmış, 2006-2008-ci illərdə ARDNŞ-nin Ekologiya İdarəsinin rəisi, 2008-ci ildən isə “Ekol Mühəndislik Xidmətləri” QSC-nin baş direktoru olmuşdur.
tarix : 15.05.2010
|