Qeyd olunduğu kimi “Ekol Mühəndislik Xidmətləri” QSC-nin fəaliyyət sahələrindən biri də yaşıllıqların salınması və onlara aqrotexniki xidmətlərin göstərilməsidir. Bu məqsədlə 2010-cu ildə QSC-nin Torpaqların rekultivasiyası departamentinin tərkibində yaşıllaşdırma üzrə yeni bir sahə yaradılmış ( TRD 3-cü sahə), bu sahəyə xeyli sayda ixtisaslı aqronomlar, bağbanlar və digər mütəxəssislər, eləcə də xüsusi avadanlıqlar və texnika cəlb olunmuşdur.
Yeni yaradılmış sahə qısa müddətdə QSC-nin istehsalat sahələrində yaşıllıqların salınması və aqrotexniki xidmətlərin göstərilməsi istiqamətində xeyli işlər görmüşdür. ARDNŞ-nin tabeçiliyində olan bir sıra təşkilatların, o cümlədən “Bibiheybətneft” NQÇİ-nin mədən ərazilərindəki mövcud yaşıllıqlara aqrotexniki xidmət göstərilməsi də QSC-nin TRD 3 sahəsinə həvalə edilmişdir.
Paytaxtın qərb qapısı hesab edilən, xüsusi coğrafi mövqeyi, relyefi, meteoroloji xüsusiyyətləri və infrastruktur şəbəkəsinin müxtəlifliyi ilə Abşeron yarımadasının digər ərazilərindən fərqlənən Bibiheybət sahəsində yaşıllıqlara aqrotexniki xidmət göstərilməsi xüsusi diqqət və yanaşma tələb etdiyindən, TRD 3 sahəsinin ən peşəkar mütəxəssisləri və texniki vasitələri bu əraziyə cəlb olunmuşdur.
Fevral ayından başlayaraq Bibiheybət sahəsində olan 50 000 -ə qədər müxtəlif növ ağaclara mövsümü xidmətlər göstərilmiş, qurumuş ağaclar yenisi ilə əvəz edilmiş, ərazinin su təchizatı təmin olunmuşdur.
Bu ərazilərdə əkilmiş ağacların 100%-li bitişinin təmin olunmasında, inkişaf etməsində suyun və suvarma üsullarının əsas amil olması nəzərə alınaraq, QSC yaşıllıqlara xidmət sahələrində effektli və müasir suvarma üsullarının tətbiqinə başlamışdır.
Bununla əlaqədar olaraq Bibiheybət ərazisində 1.2 ha sahədə damcı üsulu ilə suvarma sistemi quraşdırılıb istifadəyə verilmişdir. Bu layihən Türkiyənin “Elite” şirkəti həyata keçirmişdir. Bu sistemlə gün ərzində hər bir ağaca 2 saat ərzində 10 litrə qədər su verilir ki, bu da öz növbəsində həm bitkilərin suya olan tələbatının optimal ödənilməsinə, həm də su itkisinin qarşısının alınmasına şərait yaradır.
“Ekol Mühəndislik Xidmətləri” QSC damcı üsulu ilə suvarma sistemlərinin digər xidmət sahələrində quraşdırılması istiqamətində tədbirlərini davam etdirir.
tarix : 20.05.2010
|