|
ARDNŞ Ekoloji Siyasətində respublikamızın ekoloji vəziyyətinin yaxşılaşdırılması istiqamətində irimiqyaslı layihələrin həyata keçirilməsi ilə yanaşı, ekoloji maarifləndirmə məsələlərinə də geniş yer ayrılmışdır. Ümummilli lider Heydər Əliyevin imzaladığı “Əhalinin ekoloji təhsili və maarifləndirilməsi haqqında” Azərbaycan Respublikasının qanununu əldə rəhbər tutaraq, ARDNŞ ekoloji maarifləndirmə və təbliğat məsələlərinə daha çox diqqət yetirir. Şirkətin prezidenti cənab Rövnəq Abdullayevin 12 avqust 2008-ci il tarixli, 123 saylı əmri ilə tədbirlər planı təsdiq edilmiş, ekoloji təbliğat və maarifləndirmə işlərinə start verilmişdir.
“Ekol Mühəndislik Xidmətləri” QSC –də öz sahəsində 2008-ci ilin sonundan etibarən tədbirlər planında nəzərdə tutulmuş ekoloji təbliğat və maarifləndirmə işlərinin yerinə yetirilməsinə başlamış və bu istiqamətdə vaxtaşırı tədbirlər görmüşdür.
Bu tədbirlərin davamı olaraq “Ekol Mühəndislik Xidmətləri” QSC üzv olduğu Azərbaycandakı Amerika Ticarət Palatasının təşəbbüsü ilə, “Ekologiya İli” çərçivəsində may ayında Bakı şəhərinin Zərifə Əliyeva adına, eləcə də 20, 23, 6 saylı lisey - məktəblərində və “SOS uşaq kəndi” internat məktəbində ekoloji maarifləndirmə tədbirlərini həyata keçirmişdir.
Azərbaycandakı Amerika Ticarət Palatasının və “Ekol Mühəndislik Xidmətləri” QSC–nin rəhbər işçilərinin və mütəxəssislərinin birgə keçirdiyi bu layihə, məktəblilərin mədəniyyətinin, onların dünya görüşlərinin, düşüncə tərzlərinin və yeni davranış stereotiplərinin ekoloji cəhətdən formalaşmasına yönəldilmişdir.
Adı çəkilən məktəblərdə təqdim olunan əyani materiallarla respublikamızın ekoloji vəziyyəti, ekoloji problemlərin həlli yolları, ölkəmizin təbii ehtiyatları, alternativ enerji mənbələri, onlardan səmərəli istifadə və digər ekoloji mövzular barədə geniş məlumat verilmişdir.
Təqdimatlarda qeyd olunmuşdur ki, cəmiyyətin elə bir sahəsi yoxdur ki, orada ekologiyanın prinsip və qaydaları nəzərə alınmasın. Bununla belə, ekologiyanın vacibliyi hələ tam dərk edilməmiş və lazımı səviyyəyə qaldırılmamışdır. Müxtəlif sosial, maddi-texniki, hüququ faktorların sırasında ekoloji təhsilin və ekoloji mədəniyyətin aşağı olması təhlükəli ekoloji durumun əsas səbəblərindəndir.
Məktəblilərin diqqətinə çatdırılmışdır ki, özünün və kainatın sirlərini dərk etməyin sonsuz arzuları ilə yaşayan insan ümumbəşəri dəyərlərdən hesab edilən ekologiya məsələlərinə münasibətində dəyişiklik etməli, ekologiyanın gələcək mənzərəsinin təsvirini verməyi bacarmalıdır. Əminliklə bildirilmişdir ki, ekoloji biliklərin hər bir insana çatdırılması onun cəmiyyətdə tutduğu mövqedən asılı olmayaraq həyat fəaliyyətinin bütün sahələrində təbiətə münasibətdə düzgün mövqedə durmasında xüsusi rol oynayacaq. Ekoloji biliklər hər bir kəsin mədəniyyətinin və dünyagörüşünün ayrılmaz hissəsi olacaq. Bu isə cəmiyyətin, xalqın və ölkənin sağlam həyatı deməkdir.
2010-cu ilin ölkə Prezidenti tərəfindən “Ekologiya İli” elan edilməsinin əsas məqsədi isə ekoloji problemlərin ümumxalq problemi olduğunu bütün səviyyələrdə təsbit etməkdir. Bu prosesin həyata keçirilməsi təhsilin bütün pillələrində ekoloji biliklərin mənimsənilməsinə nail olmağı tələb edir.
Məktəblərdə keçirilən təqdimatlar şagird və müəllim heyəti tərəfindən böyük maraqla qarşılanmış, qarşılıqlı dialoq şəraitində keçmişdir. Məktəblilərə “Ekol Mühəndislik Xidmətləri” QSC-nin rəmzi hədiyyələri təqdim olunmuş, “SOS uşaq kəndi” internat məktəbinə isə əlavə olaraq televizor hədiyyə edilmişdir.
Qeyd olunmuşdur ki, gənclərin ekoloji maarifləndirilməsi, məktəblərlə qarşılıqlı əməkdaşlıq və davamlı olaraq ekoloji tədbirlərin keçirilməsi “Ekol Mühəndislik Xidmətləri” QSC–nin fəaliyyətinin əsas istiqamətlərindəndir və bundan sonra da davam etdiriləcəkdir.
tarix : 21.05.2010
|
ana səhifə
Satınalma
əlaqə
Futzal
Alternativ Enerji
Bu maraqlıdır
