ARDNŞ “Ekologiya İli” çərçivəsində nəzərdə tutulmuş tədbirlər planına uyğun olaraq neft sənayesi sahələrində irimiqyaslı ekoloji layihələri uğurla həyata keçirir. Bu işlərin yerinə yetirilməsində, xüsusilə neftlə çirklənmiş torpaqların təmizlənməsi və şlamın bioremediasiyası layihələrinin icrasında “Ekol Mühəndislik Xidmətləri” QSC “PODRATÇI” qismində yaxından iştirak edir. Artıq “Siyəzənneft” NQÇİ, Z.Tağıyev adına NQÇİ və “Abşeronneft” NQÇİ-nin mədən ərazilərində layihələrin icrası uğurla davam edir.
Bununla yanaşı 2010-cu ildə QSC tərəfindən neftlə çirklənmiş ərazilərin təmizlənməsi istiqamətində daha bir neçə yeni layihələrin icrasına başlanması nəzərdə tutulmuşdur.
Yeni layihələrdən biri də “Balaxanıneft” NQÇİ-nin Kürdəxanı mədən ərazisində ayrılmış neftlə çirklənmiş sahələrin (33 hektara qədər) bioremediasiyası işlərinin yerinə yetirilməsidir. Layihənin həyata keçirilməsi ilə əlaqədar olaraq 20 may 2010-cu il tarixdə “Azneft” İstehsalat Birliyi ilə “Ekol Mühəndislik Xidmətləri” QSC arasında müqavilə imzalanmış və iyun ayında layihənin icrasına başlanılması nəzərdə tutulmuşdur.
Bununla əlaqədar olaraq, QSC-nin Ekoloji monitorinq departamenti tərəfindən layihə sahəsində kompleks monitorinq qiymətləndirilməsi aparılmışdır. Monitorinq nəticəsində ərazidə lay sularının axdılması nəticəsində formalaşmış neftlə çirklənmiş sahələr, uzunmüddətli fəaliyyət nəticəsində formalaşmış qudronlu neftşlam sahələri və ləğv olunmuş quyu özül sahələri kimi çirklənmə mənbələri aşkar olunmuşdur.
Çöl tədqiqatlarının təhlilləri nəticəsində “Balaxanıneft” NQÇİ-nin 2-ci mədəninin Kürdəxanı sahəsində ləğv olunmuş 6 quyuətrafı zonada 6 ha qədər çirklənmə sahələri və bu sahələrdə 23 277 m3 neftşlam, 33 773 m3-dən çox xam neft-su tərkibli tullantının olduğu müəyyən edilmişdir.
“Ekol Mühəndislik Xidmətləri” QSC müqavilə şərtlərinə əsasən layihə sahəsində landşaft-bərpa tədbirlərinin aparılması məqsədilə, ilk növbədə quyuətrafı zonalardan xüsusi texnikanın köməyi ilə quyu məhsullarının və lay sularının neftyığım məntəqələrinə daşınmasını, neftşlamın çirklənmə sahələrindən xüsusi ayrılmış bioremediasiya sahəsinə daşınaraq texnoloji reqlamentə uyğun utilizasiyasını və antropogen fəaliyyət nəticəsində sıradan çıxmış sahələrdə mexaniki rekultivasiyası işlərinin yerinə yetirilməsini nəzərdə tutur.
Hazırda layihə sahəsində hazırlıq işləri görülür. Layihənin cari ilin sonunadək başa çatdırılması planlaşdırılmışdır.
tarix : 27.05.2010
|