1-4 iyun 2010-cu il tarixlərdə  Bakı EKSPO Mərkəzində keçirilən 17-ci Azərbaycan Beynəlxalq Xəzər Neft və Qaz, Neft Emalı və Neft Kimyası sərgisi dünyanın  neft sənayesi liderlərini  öz meydançasında yenidən bir araya gətirdi. Sərgiyə dünyanın 24 ölkəsindən     300 - dən çox şirkət qatılmışdır.

   İyunun 1-də sərginin açılışı olmuşdur. Açılış mərasimində Azərbaycan Respublikasının Prezidenti İlham Əliyev, Azərbaycanın birinci xanımı, YUNESKO-nun və İSESKO-nun  xoşməramlı səfiri, Heydər Əliyev Fondunun prezidenti Mehriban Əliyeva, Nazirlər, Komitə sədrləri, ARDNŞ-nin prezidenti ,   xarici səfirliklərin  və şirkətlərin nümayəndələri, iri neft sənaye müəssisələrinin ,  idarələrin və təşkilatların rəhbərləri iştirak etmişlər.

    Mərasimdə çıxış edən ölkə başçısı, öncə sərgi iştirakçılarını təbrik etmiş və bu sərginin ölkələr və şirkətlər arasında qarşılıqlı əlaqələrin  qurulmasında böyük əhəmiyyət kəsb etdiyini xüsusilə vurğulamışdır. Daha sonra Respublika Prezidenti  neft-qaz və kimya sənayesi sahəsində respublikamızda, eləcə də dünyada baş verən müsbət dəyişikliklər barədə geniş məruzə etmiş, sərgi iştirakçılarına gələcək fəaliyyətlərində uğurlar arzulamışdır.

     Bir çox sahələri əhatə edən sərgidə, müxtəlif sahələrdə fəaliyyət göstərən şirkətlər, eləcə də dövlət müəssisələri arasında tanışlıq və əməkdaşlıq münasibətlərinin  qurulması üçün əlverişli şərait yaranmışdır.

   “Ekol Mühəndislik Xidmətləri” QSC də iştirakçılarda maraq doğuran stendi və eksponatları ilə 17-ci  “Xəzər Neft və Qaz 2010” sərgisinin iştirakçısıdır. QSC-nin fəaliyyət sahələrini və həyata keçirdiyi ekoloji layihələri əks etdirən elektron məlumatlar və əyani eksponatlar sərgi iştirakçıları tərəfindən maraqla izlənilir.

   17-ci “Xəzər Neft və Qaz 2010” sərgisi iyunun 4-nə qədər davam edəcəkdir.

tarix : 01.06.2010