2010-cu ildə “Ekol Mühəndislik Xidmətləri” QSC mühüm ekoloji layihələri icra etməklə yanaşı, istehsalat və qeyri yaşayış sahələrində əsaslı təmir, rekonstruksiya, abadlaşdırma və yaşıllaşdırma işlərinin yerinə yetirilməsi istiqamətində də məqsədli tədbirlər həyata keçirir.
QSC-nin strukturunun təkmilləşdirilməsi və fəaliyyət sahələrinin genişlənməsi ilə əlaqədar, hazırda ötən il xidməti məqsədlər üçün QSC-nin istifadəsinə verilmiş, Suraxanı rayonu, Zığ qəsəbəsi, Hövsan yolu ünvanında yerləşən qeyri – yaşayış sahəsində (A-4 sahəsi adlanan) təmir-tikinti, abadlaşdırma və yaşıllaşdırma işləri daha böyük vüsət almışdır.
Ötən dövr ərzində A-4 sahəsinin inzibati və yardımçı binalarında əsaslı təmir və rekonstruksiya işləri aparılmış, sahə yeni su xətti və çiləyici suvarma sistemi ilə təchiz olunmuşdur. İndiyədək ərazidə 1 900 ədəd mühitə davamlı ağac və 200-ə qədər bəzək kolları əkilərək becərilmişdir. İyun ayının sonunadək dibçəkdə əkilməsi nəzərdə tutulan 100 ədəd qızıl gül, 300 ədəd isə bəzək kolları üçün sahə ayrılaraq aqrotexniki qaydada hazırlanmışdır.
Hazırda A-4 sahəsində elektrik təchizatının yaxşılaşdırılması məqsədilə yeni 100 kva/amp-lik transformatorun quraşdırılması üçün yardımçı binanın tikilməsi, asfalt örtüyünün və səkilərin dəyişdirilməsi, eləcə də inzibati binanın fasadına üzlük daşların çəkilməsi istiqamətində işlər davam etdirilir.
tarix : 21.06.2010
|