Xəbər verildiyi kimi, Respublika Prezidentinin 12 may 2010-cu il tarixli Sərəncamı ilə “Ekol Mühəndislik Xidmətləri” QSC-nin baş direktoru Soltan Tərlan oğlu Əliyevin ARDNŞ-nin ekologiya üzrə vitse-prezidenti təyin edilmişdir. Bununla əlaqədar olaraq, təsisçilərin birgə qərarı ilə həmin tarixdən QSC-nin baş direktorunun ümumi işlər üzrə müavini Ramil Cavanşir oğlu Əliyev “Ekol Mühəndislik Xidmətləri” QSC-nin baş direktoru vəzifəsinə təyin olunmuşdur.
Təsisçilərin və QSC-nin baş direktorunun 23 iyun 2010-cu il tarixli birgə qərarı ilə baş direktorun ümumi işlər üzrə müavini vəzifəsinə isə Təchizat şöbəsinin rəisi İsrafil İsmayıl oğlu Əliyev təyin edilmişdir.
İyun ayının 24-də yeni təyinatla əlaqədar QSC-nin mərkəzi ofisində təqdimat mərasimi keçirilmişdir. Mərasimdə çıxış edən baş direktor Ramil Əliyev öncə yeni təyinatla qəbul edilmiş düzgün qərara görə təsisçilərin ( ARDNŞ və “Lancer Services S.A.” Şirkəti) rəhbərlərinə öz minnətdarlığını bildirdi.
Daha sonra baş direktor İsrafil Əliyevin əmək fəaliyyətindən, yüksək insani keyfiyyətlərindən və təşkilatçılıq bacarığından danışaraq, onun yeni vəzifədə daha fəal və yaradıcı fəaliyyət göstərəcəyinə əmin olduğunu bildirdi və İ. Əliyevi təbrik edərək ona gələcək fəaliyyətində uğurlar arzuladı.
Təqdimat mərasimində çıxış edənlər, baş direktorun istehsalat üzrə müavini-texniki direktor Məzahir Hüseynov, Maliyyə uçot departamentinin rəisi Əli Bağışov və digərləri yeni təyinatın ədalətli və düzgün qərar olduğunu qeyd etdilər. Çıxışçılar İsrafil Əliyevi təbrik edərək, onu səmimi, intellektual səviyyəli bir insan, bacarıqlı kadr kimi tanıdıqlarını və bu vəzifəyə layiq olduğunu xüsusilə vurğuladılar.
İsrafil Əliyev öz çıxışında ona göstərilən bu yüksək etimada görə təsisçilərin və QSC-nin rəhbərlərinə dərin təşəkkürünü bildirdi. O, öz fəaliyyətində işgüzarlıq, sosial ədalət və qarşılıqlı hörmət prinsiplərinə daim sadiq qalacağını, QSC-nin inkişafı üçün bütün imkanlarını səfərbər edəcəyini mərasim iştirakçılarının diqqətinə çatdırdı.
Əliyev İsrafil İsmayıl oğlu – 21 avqust 1980-cı ildə Naxçıvan şəhərində anadan olub. Orta təhsilini 1997-ci ildə Naxçıvan şəhərində bitirib. Bakı Dövlət Universitetinin Hüquq fakültəsində 2001-ci ildə bakalavr, 2003-cü ildə isə magistr təhsilini başa vuraraq hüquqşünas ixtisasına yiyələnib.
İkinci ali təhsilini Naxçıvan Özəl Universitetinin “İqtisadiyyat” fakültəsini bitirməklə başa vurub.
İlk əmək fəaliyyətinə 1999-cu ildə müxtəlif vaxtlarda Bakı şəhərinin Nizami və Səbayel rayonlarının Məhkəmə orqanlarında başlayıb.
2001-2003-cü illərdə Azərbaycan Respublikası Vergilər Nazirliyi yanında Vergi Cinayətlərinin İbtidai Araşdırılması Departamentində çalışıb.
2004-2005-ci illərdə “Azinteroil” Birgə müəssisəsində hüquqşünas vəzifəsində işləyib.
2006-cı ildən “Ekol Mühəndislik Xidmətləri” QSC-də Təchizat şöbəsinin rəisi vəzifəsində çalışıb.
23 iyun 2010-cu ildə “Ekol Mühəndislik Xidmətləri” QSC-nin baş direktorunun ümumi işlər üzrə müavini vəzifəsinə təyin edilib.
2007-ci ilin oktyabr ayından Yeni Azərbaycan Partiyasının üzvüdür.
Ailəlidir, 3 övladı var.
tarix : 25.06.2010
|