“Ekol Mühəndislik Xidmətləri” QSC-nin “Ekologiya İli” çərçivəsində həyata keçirdiyi layihələrdən biri də Z.Tağıyev adına NQÇİ-nin (Qala qəsəbəsi) mədən ərazisinin 10 hektar sahəsində şlamın bioremediasiya layihəsidir.

    2010-cu ilin fevral ayından icrasına başlanmış layihənin icrası QSC-nin Torpaqların rekultivasiyası departamenti (TRD) tərəfindən öz ahəngi ilə davam etdirilir. Bu dövr ərzində ərazidən  36 min m3-dən artıq uzun illər yığılıb qalmış şlam çıxarılmışdır. Hazırda şlamın bioremediasiyası prosesi davam etdirilir.

    Bununla yanaşı  şlam çıxarılmış sahələrin torpaqlanması işləri də uğurla davam etdirilir. Bu günə qədər həmin ərazilərə 40 min m3 -dən çox  torpaq daşınmış və hamarlama işləri aparılmışdır.

     Z.Tağıyev adına NQÇİ mədən ərazisinin layihə sahəsində 2 120-dən çox mühitə davamlı ağac əkilmiş və 95 %-ə qədər bitiş alınmışdır. TRD-nin 3-cü sahəsi (yaşıllaşdırma üzrə) isti yay günlərində ağacların vaxtı-vaxtında suvarılması və aqrotexniki xidmətlərin göstərilməsi üçün xüsusi rejimdə işləyirlər. Yaşıllıqların mühafizə olunması üçün ərazi  dəmir torlarla çəpərlənmiş və sahədə xeyli abadlıq işləri görülmüşdür. Layihə üzrə görülən işlər sayəsində ərazinin görkəmi tamamilə dəyişmişdir.

tarix : 28.07.2010