“Ekol Mühəndislik Xidmətləri” QSC-nin fəaliyyət sahələrinin genişlənməsi və onun maddi-texniki bazasının gücləndirilməsi daim təsisçilərin diqqət mərkəzindədir. Müasir texnika və texnologiyaların alınıb istehsalata tətbiq edilməsi ilə yanaşı ARDNŞ-nin struktur bölmələrinin balansında olan müvafiq qurğuların və qeyri yaşayış sahələrinin QSC-nin istifadəsinə verilməsi də maddi-texniki bazanın gücləndirilməsinə təkan verən tədbirlər silsiləsindəndir.
Bu önəmli tədbirlərdən biri də ötən ilin oktyabr ayında Azərbaycan Respublikasının Əmlak Məsələləri Dövlət Komitəsinin 20.10.2009-cu il tarixli, 102 saylı Sərəncamı ilə Bakı şəhəri, Suraxanı rayonu, Zığ qəsəbəsi, Hövsan yolu ünvanda yerləşən, ümumi sahəsi 414.3 m2 təşkil edən və ARDNŞ-nin Ekologiya İdarəsinin balansında olmuş qeyri-yaşayış sahəsinin xidməti məqsədlər üçün QSC-nin istifadəsinə verilməsidir.
A-4 qurğusu adlandırılan bu qeyri-yaşayış sahəsi QSC-nin müvafiq struktur bölmələrinin yerləşdirilməsi və yeni fəaliyyət sahələri üçün nəzərdə tutulur. Bununla əlaqədar cari ilin əvvəlindən burada rekonstruksiya və abadlaşdırma işlərinə başlanılmışdır.
Bu müddət ərzində qeyri-yaşayış sahəsinin ətrafındakı ərazilərdə torpaq hamarlama işləri aparılmış, həmin sahələrdə 2000-dən çox ağac və bəzək kolları əkilmişdir. A-4 qurğusuna yeni su və qaz xətləri çəkilmiş, ərazidəki daxili yollar yenidən təmir olunmuşdur. Sahənin elektrik təchizatının yaxşılaşdırılması məqsədilə ərazidə yeni transformator quraşdırılmış, inzibati binada əsaslı təmir işləri yerinə yetirilmişdir.
Hazırda “Ekol Mühəndislik Xidmətləri” QSC–ni həyata keçirdiyi ekoloji layihələrdə və istehsalat sahələrində istifadə olunan mühitə davamlı ağaclar və bəzək kolları ilə təmin etmək məqsədilə, A-4 qurğusunun ərazisindəki yardımçı binada tinglik (şitillik) təsərrüfatının yaradılması istiqamətində rekonstruksiya və təmir işləri aparılır.
A-4 qurğusunda yenidənqurma, abadlaşdırma və yaşıllaşdırma işləri yüksək templə davam etdirilir.
tarix : 10.08.2010
|