“Ekol Mühəndislik Xidmətləri” QSC-nin Torpaqların rekultivasiyası departamenti müqavilə şərtlərinə uyğun olaraq,  “Siyəzənneft” NQÇİ-nin mədən ərazilərində bioremediasiya işlərinin əsas mərhələsinə başlamışdır.

     Cari ilin fevral ayından başlayaraq indiyədək layihə ərazilərindən  46 min m3-ə qədər neftşlam, 28 min m3- ə qədər çirkab su çıxarılmış, həmin ərazilərə  90 min m3 -ə qədər torpaq daşınmışdır.

    Müvafiq dövrdə “Siyəzənneft” NQÇİ-nin NYM –də (10 ha)  layihə üzrə  işlər başa çatdırılmış və yaşıllaşdırma tədbirləri görülmüşdür. Hazırda isə Ataçay   ( 6 ha), Sadan  ( 1.5 ha) və Gil-qil çay ( 7 ha) mədən ərazilərində  bioremediasiya işlərinin əsas mərhələsi həyata keçirilir. Bu məqsədlə çirklənmiş ərazilərdən çıxarılmış neftşlam bioremediasiya sahələrinə daşınaraq yayılmış, həmin sahələrə 2.4 m3 saman, 807 m3 peyin,  7 tona qədər ammofoska və 7 tona qədər nitrofoska gübrələri verilmişdir.

     “Ekologiya İli” çərçivəsində “Siyəzənneft” NQÇİ-nin mədən ərazilərində çirklənmiş torpaqların bioremediasiyasının nəzərdə tutulmuş müddətdə başa çatdırılması məqsədilə, qüvvələr səfərbər edilmiş və işlərin fasiləsizliyi təmin olunmuşdur. Layihə üzrə işlər yerinə yetirildikcə, Bakıdan 90 km-lik bir məsafədə yerləşən, öz əsrarəngiz gözəlliyi ilə seçilən Siyəzən rayonunun dağlar qoynundakı mədən ərazilərinin də görkəmi dəyişir və öz əvvəlki təbii mənzərəsi bərpa olunur.

tarix : 01.09.2010