ARDNŞ ölkə iqtisadiyyatının inkişafındakı əvəzsiz fəaliyyəti ilə yanaşı, müxtəlif sahələrdə mühüm əhəmiyyətli layihələr həyata keçirir. Bu layihələrdən biri də möhtərəm Prezidentimiz İlham Əliyevin təşəbbüsü ilə 2005-ci ildən başlayaraq Şirkətin Xaricdə Təhsil layihəsidir. Bu müddət ərzində respublikamızın onlarla bacarıqlı gəncləri dünyanın qabaqcıl ali məktəblərində təhsillərini davam etdirirlər. ARDNŞ-nin xətti ilə 102 tələbə dünyanın ən yaxşı ali məktəblərində təhsil alır. Bundan əlavə 50 nəfərə qədər tələbə isə ali təhsilini başa vuraraq Vətənə qayıdıb və Dövlət Neft Şirkətində işlə təmin olunublar. Hazırda həyata keçirilən “SOCAR Yay Məktəbi” layihəsinin iştirakçıları da Şirkətin Təqaüd Proqramı əsasında xaricdə təhsillərini başa vurub geri qayıtmış gənclərindən ibarətdir.
ARDNŞ-nin maddi dəstəyi ilə tələbələr üçün təşkil olunmuş “SOCAR Yay Məktəbi”ndə 30 nəfər -21 oğlan, 9 qız iştirak edir. İştirakçılar 29 avqust - 6 sentyabr tarixlərində Şıx çimərliyində yerləşən “Ramada” otelində qalacaqlar.
Yay Məktəbinin Proqramı enerji sektorunun bütün sahələrini -neft-qaz yataqlarının geologiya-geofizikası, quyuların qazılması, neft-qaz hasilat, nəqli və saxlanması, neft-qaz emalı və neft kimyası, ekoloji normalar və alternativ enerji mənbələri, neft-qaz hasilatı və emalı sənayesinin iqtisadiyyatı, neft və neft məhsullarının satışı sahələrini əhatə edəcəkdir. İştirakçılar interaktiv qaydada Şirkətin rəhbər işçilərinin mühazirələrini dinləyəcək, praktiki məşğələlər keçəcək, ARDNŞ-nin idarə və müəssisələrində ekskursiyalarda olacaqlar.
Proqrama əsasən “SOCAR Yay Məktəbi”nin iştirakçıları sentyabrın 2-də “Ekol Mühəndislik Xidmətləri” QSC-nin Oqtay Vəliyev-1 ünvandakı Tullantıların Emalı Departamentinin istehsalat sahələrində olmuşlar. Öncə iştirakçılar QSC-nin daxili intizam və təhlükəsizlik qaydaları ilə təlimatlandırılmış, müəssisənin ümumi fəaliyyəti haqqında məlumatlandırılmışlar. Sonra, iştirakçılar istehsalat sahələrində olan təmizləyici və emal qurğularının iş prinsipləri ilə yaxından tanış olmuş, onlara sənaye-çirkab sularının və parafinin təmizlənməsi, neftşlamın emalı və zərərsizləşdirilməsi texnologiyaları haqqında ətraflı məlumat verilmişdir. QSC-nin istehsalat fəaliyyəti Yay Məktəbi iştirakçılarında böyük maraq doğurmuşdur.
tarix : 03.09.2010
|