Azərbaycanda 2010-cu ilin “Ekologiya İli” elan edilməsi ilə əlaqədar, Nazirlər Kabinetinin qərarına uyğun olaraq sentyabrın 16-da Bakıda, Heydər Əliyev adına İdman-Konsert Kompleksində “Azərbaycan yaşıl dünya naminə -2010” adlı beynəlxalq sərgi öz işinə başlayıb. Beynəlxalq sərgi Ekologiya və Təbii Sərvətlər Nazirliyinin rəsmi dəstəyi və Azərbaycan Ticarət Sənaye Palatasının təşkilatçılığı ilə keçirilir və sentyabrın 18-dək davam edəcəkdir.
Sərginin keçirilməsində məqsəd, respublikamızda ekoloji vəziyyətin yaxşılaşdırılması istiqamətində həyata keçirilən layihələri, tətbiq olunan nanotexnologiyaları, xarici ölkələrlə əməkdaşlıq əlaqələrini və ölkəmizin təbii ehtiyatlarını geniş auditoriyaya təqdim etməkdən ibarətdir. Sərgiyə ekoloji problemlərin həlli ilə məşğul olan 30-a qədər yerli və xarici şirkətlər, dövlət və QH təşkilatları qatılmışlar.
Sərgidə Azərbaycan Respublikasının Prezidenti İlham Əliyev, Fövqəladə Hallar naziri Kəmaləddin Heydərov, Ekologiya və Təbii Sərvətlər naziri Hüseyn Bağırov, Mədəniyyət və Turizm naziri Əbülfəz Qarayev, ARDNŞ-ın Ekologiya üzrə vitse-prezidenti Soltan Əliyev, digər dövlət rəsmiləri, şirkət və müəssisə rəhbərləri iştirak etmişlər.
“Azərbaycan yaşıl dünya naminə-2010” beynəlxalq sərgidə “Ekol Mühəndislik Xidmətləri” QSC üçün ayrılmış pavilyonda QSC öz fəaliyyətini, ekologiya sahəsində əldə etdiyi nailiyyətlərini texnika və texnologiyalarını əks etdirən yüksək tərtibatlı stend və maketləri, elektron məlumat bazasını, video çarxları və tullantılardan səmərəli istifadə olunaraq hazırlanmış eksponatları sərgi iştirakçılarına təqdim etmişdir.
Sərgidə iştirak edən dövlət rəsmiləri “Ekol Mühəndislik Xidmətləri” QSC -nin də pavilyonunda olmuş, sərgi materiallarını diqqətlə izləmişlər. Baş direktor Ramil Əliyev dövlət rəsmilərinə QSC-nin fəaliyyəti, texniki imkanları və 2010-cu il, “Ekologiya İli” çərçivəsində həyata keçirdiyi ekoloji layihələr barədə geniş məlumat vermişdir. Sərgi materialları və verilən məlumatlar dövlət rəsmiləri tərəfindən maraqla qarşılanmışdır.
Bu sərgidə maraqlı təqdimatı ilə iştirakçıların diqqətini cəlb edən “Ekol Mühəndislik Xidmətləri” QSC, 20 sentyabr “Neftçilər Günü” ilə əlaqədar Milli Parkda təşkil olunacaq sərgiyə də ciddi hazırlaşmış və bu sərgidə daha geniş proqramla iştirak edəcəkdir.
tarix : 17.09.2010
|