Sentyabrın 24-də Hyatt Regency otelinin Şuşa zalında Xəzər-Avropa İnteqrasiya İşgüzar Klubunun (CEİBC) üzvləri ilə Azərbaycan Respublikası Dövlət Neft Şirkətinin birinci vitse-prezidenti, akademik Xoşbəxt Yusifzadənin görüşü olmuşdur.
Tədbirə Klub üzvləri ilə yanaşı, Qazaxıstanın Azərbaycandakı səfiri Serik Primbetov, Ukraynanın Azərbaycandakı səfirliyinin ticarət və iqtisadiyyat missiyasının rəhbəri Miroslav Blaşşuk və digər rəsmi qonaqlar da qatılmışlar. Bu görüşdə “Ekol Mühəndislik Xidmətləri” QSC-ni baş direktor Ramil Əliyev və baş direktorun istehsalat üzrə müavini-texniki direktor Məzahir Hüseynov təmsil etmişlər.
Azərbaycanın neft-qaz sənayesinin potensialı barədə danışan ARDNŞ-nin birinci vitse-prezidenti CEBİC-in fəaliyyətini yüksək qiymətləndirmiş, Klub üzvlərinin suallarını cavablandırmışdır. Görüşdə Xəzər-Avropa İnteqrasiya İşgüzar Klubunun fəxri üzvü seçilmiş akademik Xoşbəxt Yusifzadəyə üzvlük sertifikatı təqdim olunmuşdur.
Tədbirdə 2010-cu ilin may ayında “Ekol Mühəndislik Xidmətləri” QSC-nin baş direktoru təyin olunmuş Ramil Əliyev də Xəzər-Avropa İnteqrasiya İşgüzar Klubunun üzvlük sertifikatını almışdır. Üzvlük sertifikatını R.Əliyevə ARDNŞ-nin birinci vitse-prezidenti, akademik Xoşbəxt Yusifzadə təqdim etmişdir.
Xatırladaq ki, Xəzər-Avropa İnteqrasiya İşgüzar Klubu 2002-ci ilin iyun ayında, “Caspian Energy” Beynəlxalq Nəşriyyat Evinin iştirakı və ən böyük neft-qaz şirkətlərinin dəstəyi ilə təsis edilmişdir. Təşkilatın əsas məqsədi iqtisadiyyat, siyasət, energetika, gömrük, vergi, ekologiya və s. sahələrə dair ümumi proqramın hazırlanması üçün şəraitin yaradılması, regional əhəmiyyətli müxtəlif informasiya layihələrinin həyata keçirilməsi və dövlət strukturları ilə özəl bölmələr arasında dialoqun dəstəklənməsidir.
“Ekol Mühəndislik Xidmətləri” QSC 2007-ci ildən CEİBC-nin üzvüdür və iki dəfə “ilin qalibi” nominasiyası üzrə mükafata layiq görülmüşdür.
tarix : 29.09.2010
|