“Ekol Mühəndislik Xidmətləri” QSC-nin Torpaqların rekultivasiyası departamenti 232 saylı 20.05.2010-cu il tarixli müqaviləyə əsasən, “Balaxanıneft” NQÇİ-nin Kürdəxanı mədən ərazisində neftlə çirklənmiş sahələrin bioremediasiyası” layihəsində nəzərdə tutulan işləri başa çatdırmaq üzrədir.
Cari ilin iyun ayından başlayaraq Kürdəxanı mədən ərazisində ayrılmış 7 hektara qədər ərazidə ləğv edilmiş 6 quyu ətrafında yığılmış neftşlamın bioremediasiyası məqsədilə çirklənmiş ərazilərdən 22 843 m3 neftşlam çıxarılaraq bioremediasiya sahələrinə daşınmış, şlam çıxarılan sahələrə 26 999 m3 torpaq daşınaraq yayılmışdır.
İcra müddətində 5 hektar sahəni əhatə edən bioremediasiya sahəsinə saman, peyin, ammofoska, və nitrofoska gübrələri verilmiş, 3 hektar sahədə malalama, 2 hektar sahədə isə şumlama işləri aparılmışdır. Biremediasiya prosesinin son mərhələsi olaraq, hava şəraiti nəzərə alınaraq yaxın günlərdə sahədə arpa səpininə başlanılacaqdır.
QSC-nin Torpaqların rekultivasiyası departamenti layihə üzrə əsas işləri başa çatdırmaqla yanaşı, hazırda “Balaxanıneft” NQÇİ-nin Kürdəxanı mədən ərazisində layihəyə əlavə olaraq ləğv olunmuş 3 quyu ətrafında yığılmış neftşlamın bioremediasiyası işlərinin ilkin mərhələsinə başlamışdır.
“Ekol Mühəndislik Xidmətləri” QSC-nin “Balaxanıneft” NQÇİ-nin Kürdəxanı mədən ərazisində neftlə çirklənmiş sahələrin bioremediasiyası” layihəsinin təqvim planına uyğun və keyfiyyətlə yerinə yetirilməsi üçün təxirəsalınmaz tədbirlər həyata keçirir.
tarix : 15.10.2010
|