Azərbaycan Respublikasının Prezidenti İlham Əliyevin Sərəncamı ilə təsdiq edilmiş, “Azərbaycan Respublikasında ekoloji vəziyyətin yaxşılaşdırılmasına dair 2006-2010-cu illər üçün Kompleks Tədbirlər Planı”na uyğun olaraq və 2010-cu ilin “Ekologiya İli” elan edilməsi ilə əlaqədar ARDNŞ-nin qarşısında mühüm vəzifələr qoyulmuşdur.
2006-cı ildən başlayaraq ARDNŞ tərəfindən Neftqazçıxarma İdarələrinin mədən ərazilərində 300 hektara yaxın neftlə çirklənmiş torpaq sahələri təmizlənərək və abadlaşdırılmış, çirklənmiş torpaqların bioremediasiyası və yaşıllaşdırma sahəsində bir çox iri miqyaslı ekoloji layihələr həyata keçirilmişdir. Bu layihələrin həyata keçirilməsində isə “Ekol Mühəndislik Xidmətləri” QSC yaxından iştirak edir.
2010-cu il “Ekologiya İli” ili çərçivəsində ARDNŞ-nin həyata keçirəcəyi prioritet ekoloji layihələr sırasında Z.Tağıyev adına NQÇİ-nin, “Abşeronneft” NQÇİ-nin, “Siyəzənneft” NQÇİ-nin və “Balaxanıneft” NQÇİ-nin mədən ərazilərində çirklənmiş torpaqların rekultivasiyası və bioremediasiyası layihələri xüsusi əhəmiyyət kəsb edir ki, bu layihələrin icrası da potensial icraçı qismində “Ekol Mühəndislik Xidmətləri” QSC-nə həvalə edilmişdir.
Cari ildə QSC “Azneft” İstehsalat Birliyi ilə qeyd olunan layihələr üzrə əsas işləri başa çatdırmış, bəzi sahələrdə isə bioremediasiya işləri davam etməkdədir.
QSC-nin həyata keçirdiyi ekoloji layihələr sırasında “Siyəsənneft” NQÇİ-nin mədən ərazilərində neftlə çirklənmiş torpaqların bioremediasiyası, ərazinin mürəkkəb coğrafi mövqeyə və relyefə malik olması, Respublikamızın şimal –şərq bölgəsində turizmin inkişaf etdirilməsi, ərazidə yerləşən təbii çay hövzələrinin ekoloji vəziyyətinin yaxşılaşdırılması və insanların sağlamlıqlarına təsir edən mənfi amillərin aradan qaldırılması baxımından böyük əhəmiyyət kəsb edir.
Bununla əlaqədar olaraq “Ekol Mühəndislik Xidmətləri” QSC, 30 hektara qədər ərazini təşkil etməklə Qilgilçay, Sadan NYM, Ataçay və NSKHVS (neftin, suyun kompleks hazırlanması və vurulması sexi) sahələrindən ibarət olan, “Siyəzənneft” NQÇİ-nin mədən ərazilərində ayrılmış neftlə çirklənmiş torpaqların bioremediasiyası layihəsinin keyfiyyətlə və vaxtında başa çatdırılması üçün təxirəsalınmaz tədbirlər görür. Layihə üzrə mədən ərazilərində bioremediasiya proseslərinin son mərhələsi başa çatdırılmış, sahələrə arpa əkilməsinə başlanılmışdır. QSC-nin “Siyəzənneft” NQÇİ-nin mədən ərazilərində apardığı bioremediasiya işləri nəticəsində landşaftı bərpa olunmuş və ərazilər öz əvvəlki görkəminə qaytarılmışdır.
“Ekol Mühəndislik Xidmətləri” QSC, bundan sonra da respublikamızda ekoloji vəziyyətin yaxşılaşdırılması istiqamətində ARDNŞ-nin həyata keçirəcəyi layihələrin potensial icraçısı kimi fəaliyyət göstərəcəkdir.
tarix : 22.10.2010
|