2010-cu il “Ekologiya ili” çərçivəsində Respublikamızın hər yerində, xüsusilə Abşeron yarımadasında ekoloji vəziyyətin yaxşılaşdırılması məqsədilə iri miqyaslı ekoloji layihələr həyata keçirilir. ARDNŞ də cari ildə Neftqazçıxarma İdarələrinin mədən ərazilərində uzun illər neftlə çirklənmiş torpaqların təmizlənməsi, gölməçələrin qurudulması və yaşıllıqların salınması sahəsində məqsədli işlər yerinə yetirir.
“Ekologiya ili” çərçivəsində ARDNŞ-nin həyata keçirdiyi önəmli ekoloji layihələrindən biri də, “Azneft” İstehsalat Birliyi ilə “Ekol Mühəndislik Xidmətləri” QSC-nin birgə həyata keçirdikləri Z.Tağıyev adına NQÇİ-nin mədən ərazisində 10 hektara qədər neftlə çirklənmiş torpaqların bioremediasiyası və yaşıllaşdırılması layihəsidir.
Cari ilin fevral ayından QSC-nin Torpaqların rekultivasiyası departamenti layihənin icrasına başlamış, fevral-sentyabr ayları ərazidən 37 min m3-ə qədər neftşlam çıxarılaraq bioremediasiya sahəsinə daşınmışdır. İcra müddətində əraziyə xeyli ştib və torpaq daşınaraq hamarlanmış, köhnə quyuların özülləri ləğv edilərək landşaftın bərpası istiqamətində müvafiq işlər yerinə yetirilmişdir.
Z.Tağıyev adına NQÇİ-nin mədən ərazisində ayrılmış neftlə çirklənmiş sahənin bioremediasiyası ardıcıl mərhələlərlə aparılmış, torpağa saman, peyin və üzvü gübrələr verilmiş, aqrotexniki qaydada şumlama və malalama işləri görülmüşdür. Bioremediasiya prosesinin son mərhələsində sahəyə arpa əkilmiş və gözlənilən bitiş alınmışdır. Yaz mövsümündə ərazidə xeyli sayda mühitə davamlı ağac əkilmiş, lazımı aqrotexniki xidmətlər göstərilərək 95%-ə qədər bitiş alınmışdır.
Payız mövsümünün başlanması ilə əlaqədar olaraq, QSC layihə sahəsində ağacəkmə kompaniyasına yenidən start vermişdir. İndiyədək bu ərazidə ümumilikdə 3 433 ədəd, o cümlədən 950 ədəd sərv, 2 483 ədəd isə zeytun ağacı əkilmişdir, hazırda aksiya davam edir. Xatırladaq ki, layihə smeta sənədlərinə əsasən ərazidə 5 200 ədəd müxtəlif növ ağac və 10 000 ədədə qədər gül kollarının əkilməsi nəzərdə tutulmuşdur.
“Azneft” İstehsalat Birliyi ilə “Ekol Mühəndislik Xidmətləri” QSC-nin birgə həyata keçirdikləri “Z.Tağıyev adına NQÇİ-nin mədən ərazisində ayrılmış neftlə çirklənmiş sahənin bioremediasiyası” layihəsinin nəzərdə tutulmuş müddətdə, yəni cari ilin dekabr ayında “Sifarişçi”yə təhvil verilməsi üçün bütün lazımı tədbirlər görülmüşdür.
“Ekol Mühəndislik Xidmətləri” QSC 2010-cu il, “Ekologiya ili” çərçivəsində icra etdirdiyi digər layihələri də təqvim planına uyğun olaraq davam etdirir.
tarix : 26.10.2010
|