“Ekol Mühəndislik Xidmətləri” QSC-nin fəaliyyət sahələrində kompleks tədqiqat işlərinin aparılması və laboratoriya xidmətlərinin göstərilməsi məqsədilə, 2006-cı ildə QSC-nin Kompleks tədqiqatlar laboratoriyası (KTL) yaradılmış və Milli Akkreditasiya Sistemində Texniki Səlahiyyətliyə Akkreditasiya olunmuşdur. Qısa müddət ərzində KTL müasir cihaz və avadanlıqlarla təchiz edilmiş, tədqiqat işlərinə peşəkar mütəxəssislər cəlb olunmuşdur.
Hazırda QSC-nin Ekoloji monitorinq departamentinin nəzdində fəaliyyət göstərən KTL, dənizdə və quruda ətraf mühitin vəziyyətinin tədqiq edilməsi, analitik nəzarətin aparılması üzrə xidmət göstərir. Laboratoriyanın əsas fəaliyyəti torpağın, suyun, dib çöküntülərinin və neftşlamın fiziki-kimyəvi və kimyəvi analizlərinin aparılması olmaqla, akkreditasiya sahəsi 50-dən artıq inqrediyentin təyinini özündə cəmləşdirir.
QSC-nin həyata keçirdiyi ekoloji layihələr, xüsusilə torpaqların bioremediasiyası ilkin monitorinq işlərinin nəticələrinə və laboratoriya tədqiqatlarına əsaslandığından, layihə sahələrində bioremediasiya proseslərinin dinamikası vaxtaşırı olaraq KTL tərəfindən tədqiq edilir və müvafiq hesabatlar hazırlanır. Bununla yanaşı, mütəmadi olaraq QSC-nin istehsalat sahələrindən və təmizləyici qurğulardan torpaq, su və neftşlam nümunələri götürülərək standartlara uyğun analiz edilir və nəticələrin təhlili aparılır.
2006-cı ildən Milli Akkreditasiya Sistemində Texniki Səlahiyyətliyə Akkreditasiya olunmuş KTL növbəti 2010-2011-ci illər üçün də Akkreditasiyadan keçərək Azərbaycan Respublikasının Standartlaşdırma, Metrologiya və Patent üzrə Dövlət Komitəsinin Akkreditasiya Attestatını almışdır.
tarix : 29.10.2010
|