“Ekol Mühəndislik Xidmətləri” QSC-nin daimi inkişafda olan çoxşaxəli fəaliyyət sahələri, həyata keçirdiyi, ətraf mühitin mühafizəsinə, insanların sağlamlığına və ölkə iqtisadiyyatına layiqli töhfələr verən prioritet ekoloji layihələr ictimai təşkilatlar, eləcə də KİV tərəfindən də maraqla izlənilir və mütəmadi olaraq mətbuat səhifələrində işıqlandırılır.
Məhz bunun nəticəsidir ki, 2008-2009-cu illərdə QSC ölkə iqtisadiyyatına verdiyi töhfələrə və ətraf mühitin mühafizəsi sahəsində göstərdiyi xidmətlərə görə “CASPİAN ENERGY” və “CONSULTİNG & BUSINESS” jurnallarının “İlin Şirkəti” nominasiyası üzrə mükafatlarını almışdır. 2010-cu ildə isə, “Ekologiya İli” çərçivəsində həyata keçirdiyi aktual ekoloji layihələrə, eləcə də ekoloji vəziyyətin yaxşılaşdırılması istiqamətində gördüyü işlərə görə QSC , yenidən “İlin Ekologiya Şirkəti” nominasiyası üzrə “Caspian Energy Award -2010” mükafatına layiq görülmüşdür.
Daimi inkişafda olan “Ekol Mühəndislik Xidmətləri” QSC 2010-cu ildə aktual ekoloji layihələrə və iqtisadi səmərəli fəaliyyətinə görə, nüfuzlu BUSINESS TIME jurnalının ekologiya sahəsində “İlin Şirkəti” nominasiyası üzrə AZERI BUSINESS AWARD mükafatını almışdır. Bu mükafata bəzi xarici ölkə səfirlikləri, mötəbər təşkilatlar və ölkə iqtisadiyyatına layiqli töhfələr verən 40-a qədər tanınmış şirkətlər də layiq görülmüşlər.
Qeyd edək ki, mükafat sahiblərini müəyyənləşdirmək üçün təkcə Azərbaycanda deyil, dünyanın bir çox menecerləri arasında sorğu aparılmış, çoxsaylı respondentlərin rəyinə görə qaliblər müəyyən edilmişdir.
Dekabrın 4-də “Buta Palace” Konsert-Banket Kompleksində mükafatın təqdimat mərasimi keçirilmişdir. Tədbirdə QSC-nin rəhbərliyi də iştirak etmişdir. Mükafatı alan “Ekol Mühəndislik Xidmətləri” QSC-nin baş direktoru Ramil Əliyev, onların əməyinə verilən yüksək qiymətə və göstərilən etimada görə təşkilatçılara öz minnətdarlığını bildirmiş və QSC-nin bundan sonra da respublikamızda ekoloji vəziyyətin yaxşılaşdırılması sahəsində uğurlu və səmərəli fəaliyyət göstərəcəyini qeyd etmişdir.
Təqdimat mərasimində mükafat alanların şərəfinə ziyafət və konsert proqramı təşkil olunmuşdur.
tarix : 06.12.2010
|