Xəbər verildiyi kimi, 2010-cu ildə “Ekologiya ili” çərçivəsində “Ekol Mühəndislik Xidmətləri” QSC “Azneft” İstehsalat Birliyi ilə “Siyəzənneft”, “Abşeronneft”, “Balaxanıneft” və Z.Tağıyev adına NQÇİ-nin mədən ərazilərində neftlə çirklənmiş torpaqların rekultivasiyası və neftşlamın bioremediasiyası layihələrinin icrasına başlamışdır.
Bununla əlaqədar olaraq, QSC öz texniki imkanlarını və işçi qüvvəsini səfərbər edərək layihələri layihə-smeta sənədləri əsasında, təqvim planına uyğun və keyfiyyətlə icra edilməsinə nail olmuş, “Siyəzənneft” və Z.Tağıyev adına NQÇİ-nin mədən ərazilərində layihə işlərini nəzərdə tutulmuş müddətdə başa çatdırmışdır.
Qeyd edək ki, 2010-cu ildə QSC Paytaxtdan 90 kilometrədək məsafədə yerləşən və özünün geocoğrafi xüsusiyyətləri ilə fərqlənən “Siyəzənneft” NQÇİ-nin 24.5 hektara qədər mədən ərazilərində neftlə çirklənmiş sahələrin bioremediasiyası layihəsini yerinə yetirərək, 14.5 hektar sahədə təmizləmə işləri aparmışdır. Layihə işləri “Siyəzənneft” NQÇİ-nin NYM, Ataçay, Sadan və Gil-gil çay mədən sahələrini əhatə etmişdir. İcra müddətində təmizlənmiş sahələrdən 52 744 m3 neftşlam çıxarılmış, həmin sahələrə 99 739 m3 torpaq daşınaraq hamarlanmışdır.
Z.Tağıyev adına NQÇİ-nin (Qala qəsəbəsi) mədən ərazisində isə layihə işləri 10 hektar sahəni əhatə etmiş və 4.5 hektar ərazi təmizlənmişdir. Təmizlənmiş ərazilərdən 37 min m3 neftşlam çıxarılaraq bioremediasiya olunmuşdur. Həmin əraziyə 37 min m3 ştib və 25 min m3 torpaq daşınaraq hamarlama işləri aparılmış, 5 min 200 ədəd müxtəlif ağac növləri, 10 min ədəd isə bəzək və gül kolları əkilmişdir.
Beləliklə, QSC-nin gördüyü işlər nəticəsində “Siyəzənneft” və Z.Tağıyev adına NQÇİ-nin mədən ərazilərinin layihə sahələrində çirklənmiş torpaqların reabilitasiyası və landşaftın bərpası tam təmin olunmuş, bu ərazilərin təbii görkəmi özünə qaytarılmışdır.
“Ekol Mühəndislik Xidmətləri” QSC digər layihələr üzrə işlərini davam etdirir.
tarix : 17.12.2010
|