Bu mühüm dövlət sənədlərinin icrasından irəli gələn tələblərin həyata keçirilməsi məqsədilə, əvvəlki illərdə olduğu kimi 2011-ci il və sonrakı illərdə də digər normativ hüquqi aktlardan irəli gələn tələblərə əsasən hər bir sənaye müəssisəsi üçün ekoloji normativ-texniki sənədlərin işlənib hazırlanması olduqca vacibdir.

Ekoloji normativ-texniki sənədlərin işlənib hazırlanmasında əsas məqsəd, ətraf mühitin mühafizəsi və təbii ehtiyatlardan səmərəli is­tifadə, müəssisələrin təsərrüfat fəaliyyəti zamanı ətraf mühitin mühafizəsini təmin edən norma və qaydaların tətbiqi, onlara nəzarətin həyata keçirilməsi, zəruri hallarda operativ qərarların qəbul edilməsi və ətraf mühitin mühafizəsi sahəsindəki fəaliyyətin idarə edilməsi işinin yaxşılaşdırılması üçün ekoloji normativ-texniki bazanın yaradılmasıdır.

Respublikamızda mühüm ekoloji layihələri həyata keçirməklə yanaşı, “Ekol Mühəndislik Xidmətləri” QSC ekoloji normativ-texniki sənədlərin yüksək səviyyədə işlənib hazırlanmasında da özünü təsdiq etmişdir. QSC-nin Ekoloji monitorinq departamentinin (EMD) Normativ-texniki sənədlərlə iş şöbəsi tərəfindən 2010-cu  ildə ARDNŞ-nin tabeliyində olan idarə və müəssisələr üçün 5 ədəd Ekoloji Pasport, 4 ədəd Su Təsərrüfatı Pasportu, 5 ədəd Yol Verilən Tul­lantı Həddi Normativləri layihəsi, 2 ədəd Yol Verilən Axıntı Həddi Norma­tivləri layihəsi, 2 ədəd Tullantı Mənbələrinin İnventarlaşdırılması sənədləri ol­maq­la, 18 ədəd ekoloji normativ-texniki sənəd işlənib hazırlanmış, sənəd­lər Ekologiya və Təbii Sərvətlər Nazirliyinin Dövlət Ekspertiza İdarəsi və “Azərsu” ASC Bakı Kanalizasiya Xidməti İdarəsi ilə razılaşdırılaraq “Sifa­rişçi”lərə təhvil verilmişdir.

Ötən il EMD-nin Normativ-texniki sənədlərlə iş şöbəsi “AzGerneft” MMC üçün də Ekoloji Pasportu, Yol Verilən Tullantı Həddi Norma­tivləri Layihəsini və Yol Verilən Axıntı Həddi Norma­tivləri Layihəsini işləyib hazırlamış və müvafiq qaydada təsdiq olunaraq “Sifarişçi”yə təqdim edilmişdir.

Ekoloji normativ-texniki sənədlərin müasir standartlar səviyyəsində işlənib hazırlanması üçün EMD-nin Normativ-texniki sənədlərlə iş şöbəsi lazımi avadanlıqlarla və peşəkar kadrlarla təmin olunmuş, müasir iş şəraiti yaradılmışdır. Şöbədə normativ-texniki sənədlər mövcud qanunvericilik, standartlar, rəhbər və normativ-texniki sənədlər, metodiki göstərişlər və tövsiyələr nəzərə alınmaqla, müəssisənin istehsal xarakterindən asılı olaraq xüsusi tərtibat və dizaynla işlənib hazırlanır.