Azərbaycan respublikası Prezidentinin son illər ekoloji təhlükəsizliyin təmin olunması istiqamətində qəbul etdiyi qərarlar, 2010-cu ilin “Ekologiya ili” elan olunması və Abşeron yarımadası ərazisində 3 milyon ağacın əkilməsi çağırışı ilə əlaqədar, ARDNŞ-nin neft-qaz sənayesi sahələrində ekoloji problemlərin həlli və ətraf mühitin mühafizəsi sahəsində həyata keçirdiyi məqsədyönlü tədbirlər nəticəsində uğurlu nailiyyətlər əldə edilmişdir.
Ötən il ARDNŞ-nin çoxsaylı kollektivi tərəfindən fəaliyyət sahələrində yaşıllaşdırma işləri istiqamətində mütəmadi olaraq geniş miqyaslı iməciliklər, ağacəkmə kompaniyaları həyata keçirilmiş, reabilitasiya olunmuş mədən ərazilərində, istehsalat sahələrində, inzibati binaların ətrafında və digər ərazilərdə xeyli sayda müxtəlif növ ağac və dekorativ gül kolları əkilmişdir. İl ərzində salınmış yaşıllıqlara müvafiq aqrotexniki xidmətlər göstərilmişdir.
Bütün bu tədbirlərin fəal iştirakçısı olan “Ekol Mühəndislik Xidmətləri” QSC-nin ekoloji layihələrinin prioritet istiqamətlərindən biri də, neft və neft məhsulları ilə çirklənmiş torpaqların təmizlənməsi və reabilitasiya olunmuş ərazilərdə yaşıllıqların salınması, eləcə də bitkilərə aqrotexniki xidmətlərin göstərilməsidir.
2010-cu ildə, QSC “Ekologiya ili” çərçivəsində “Azneft” İB ilə birgə Z.Tağıyev adına NQÇİ-nin, “Siyəzənneft” NQÇİ-nin, “Abşeronneft” NQÇİ-nin və “Balaxanıneft” NQÇİ-nin mədən ərazilərində çirklənmiş torpaqların təmizlənməsi və landşaftın bərpası sahəsində uğurlu layihələr həyata keçirmişlər. Layihələri icra edən QSC-nin Torpaqların rekultivasiyası departamenti sonrakı mərhələdə, reabilitasiya olunmuş layihə ərazilərində yaşıllaşdırma tədbirlərini də yerinə yetirmişdir. Ötən il Z.Tağıyev adına NQÇİ-nin təmizlənmiş mədən ərazisində QSC tərəfindən 5 200 ədəd müxtəlif növ ağac, 10 min ədəd bəzək və gül kolları, NQÇİ tərəfindən isə 3 920 ədəd müxtəlif növ ağac əkilmişdir. Bu işlər müvafiq olaraq “Abşeronneft” NQÇİ-də də davam etdirilərək təmizlənmiş mədən ərazilərində QSC tərəfindən 8 935 ədəd, NQÇİ tərəfindən isə 2 115 ədəd müxtəlif növ ağaclar əkilmişdir.
Bununla yanaşı, ADDNŞ-nin bir çox fəaliyyət sahələrdə əkilmiş ağaclara aqrotexniki xidmət göstərilməsi də “Ekol Mühəndislik Xidmətləri” QSC-nə həvalə edilmişdir. Hazırda, kollektivi əsasən peşəkar aqronomlardan, bağbanlardan və mütəxəssislərdən ibarət olan QSC-nin Torpaqların rekultivasiyası departamentinin 3-cü sahəsi (yaşıllaşdırma üzrə) müqaviləyə əsasən, Qaradağ Qaz Emalı Zavodunun istehsalat sahələrindəki 9 100 ədəd, “Azneft” İB-nin “Bibiheybətneft” NQÇİ-nin mədən ərazisindəki 47 500 ədəd, Z.Tağıyev adına NQÇİ-nin mədən ərazisindəki 19 120 ədəd və “Abşeronneft” NQÇİ-nin mədən ərazisindəki 11 050 ədəd (ümumilikdə 86 770 ədəd ) müxtəlif növ ağac, bəzək və gül kollarına yüksək səviyyədə aqrotexniki xidmət göstərir. Yaşıllıqların suvarılmasında damcı və çiləmə üsullarından geniş istifadə olunur ki, bu da öz səmərəsini verməkdədir.
“Ekol Mühəndislik Xidmətləri” QSC ARDNŞ-nin fəaliyyət sahələrində yaşıllıqların salınması və yüksək səviyyədə aqrotexniki xidmətlərin göstərilməsi istiqamətində tədbirlərini davam etdirir.
tarix : 17.02.2011
|