“Ekol Mühəndislik Xidmətləri” QSC 2011-ci ildə bir sıra ekoloji layihələrin həyata keçirilməsini planlaşdırır. Bu layihələr sırasında “Azneft”
İB-nin “Balaxanıneft” NQÇİ-nin 2-ci mədən sahəsində həyata keçiriləcək
rekultivasiya və bioremediasiya layihəsi ərazinin yaşayış məntəqələri
ilə əhatə olunması baxımından xüsusilə əhəmiyyətlidir. Layihəyə
“Balaxanıneft” NQÇİ-nin 2-ci mədən ərazisindəki 23.7 hektar neftlə çirklənmiş sahələr daxildir.
Layihənin
ilkin mərhələsində QSC-nin Ekoloji monitorinq departamentinin Səyyar
monitorinq xidməti tərəfindən ərazidə kompleks ekoloji monitorinq işləri
aparılmış, neftlə çirklənmiş sahələrin parametrləri müəyyənləşdirilmiş,
çirklənmənin dərinlik üzrə hopma intervalları təyin olunmuş, ərazidə
formalaşmış neftşlamın və gölməçələrdə olan suların ümumi həcmi
dəqiqləşdirilmişdir.
Aparılmış monitorinq nəticəsində müəyyən edilmişdir ki, ərazidə 124,9 min m3 -dən çox müxtəlif dərəcəli çirklənmə parametrlərinə malik neftşlam, 70,3 min m3 -dən
çox mədən axıntı suları mövcuddur. Mədən axıntı sularının çoxu
mədəndaxili ərazidəki süni gölməcələrdə atılmış vəziyyətdə qalmışdır.
Çirklənmə parametrlərindən asılı olaraq 98,7 min m3 neftşlamın bioremediasiya sahəsinə daşınaraq utilizasiya olunması nəzərdə tutulmuşdur.
Layihənin tələblərinə uyğun olaraq, eyni zamanda ərazinin antropogen təsir dərəcəsi öyrənilmiş, təbii landşaftın bərpasının optimal variantları təhlili
edilmişdir. Müəyyən edilmişdir ki, ərazidə uzunmüddətli neft hasilatı
təbii landşaftın ilkin görkəmini tamamilə dəyişdirmişdir. Ləğv olunmuş
özüllərin geniş sahələri tutması və keçən əsrin əvvəllərində qazılmış,
atılmış vəziyyətdə qalmış şaxta quyuları mürəkkəb ərazi diferensasiyası
yaratmışdır.
Aparılmış ekoloji
monitorinqin nəticələri geniş hesabat şəklində tərtib olunaraq layihə
hazırlanması üçün müvafiq təşkilata təqdim edilmişdir. Ekoloji
Monitorinq Departamenti tərəfindən hazırlanmış kompleks hesabatda,
ərazinin çirklənmə sahələri ayrı-ayrılıqda təhlil edilərək koordinat
şəbəkəsinə daxil edilmişdir.Hesabatda 21 nöqtədən götürülmüş neftşlam
nümunələrinin laboratoriya təhlilləri və dərinlik intervalları üzrə
karbohidrogenlərlə çirklənmələrinin dəyişmə dinamikası da verilmişdir.
Həyata keçiriləcək bu ekoloji layihə, ərazidəki yaşayış məntəqələrini çirklənmə mənbəələrindən azad etməklə yanaşı, ətraf ərazilərin ekoloji vəziyyətinin yaxşılaşdırılmasına da öz müsbət təsirini göstərəcəkdir.
tarix : 24.02.2011
|