ARDNŞ nin həyata keçirdiyi ekoloji layihələr ötən il, “Ekologiya ili” çərçivəsində daha geniş vüsət almış, xüsusən NQÇİ-nin mədən ərazilərində çirklənmiş torpaqların təmizlənməsi və yaşıllıqların salınması istiqamətində geniş miqyaslı tədbirlər görülmüşdür. Bu tədbirlərin həyata keçirilməsində “Ekol Mühəndislik Xidmətləri” QSC-də yaxından iştirak etmiş, ”Azneft” İB-nin “Abşeronneft”, “Siyəzənneft”, “Balaxanıneft” və Z.Tağıyev adına Neftqazçıxarma İdarələrinin mədən ərazilərində çirklənmiş torpaqların təmizlənməsi və yaşıllıqların salınması layihələrini uğurla başa çatdırmışdır.
Dövlət Neft Şirkəti 2011-ci ildə də NQÇİ-nin mədən ərazilərində uzun illər yığılıb qalmış ekoloji problemlərin həll olunması istiqamətində təxirəsalınmaz tədbirlərin görülməsinə başlamışdır. Tədbirlər planına “Balaxanıneft” NQÇİ-nin və Ə.Əmirov adına NQÇİ-nin mədən ərazilərində neftşlamın bioremediasiyası və Qala gölünün ətrafının neftşlamdan təmizlənməsi kimi prioritet layihələrdə daxildir. Bu layihələrin icrası isə “Ekol Mühəndislik Xidmətləri” QSC-nə həvalə edilmiş və artıq bu layihələr üzrə işlərə start verilmişdir.
“Azneft” İB-nin “Balaxanıneft” NQÇİ-nin 2-ci mədən sahəsində QSC-nin həyata keçirdiyi rekultivasiya və bioremediasiya layihəsinin ərazisi 28 ha, çirklənmiş ərazilər isə 23.7 ha təşkil edir. Monitorinq nəticəsində layihə ərazisində 124.997 m3 neftşlam müəyyən edilmişdir ki, bunun da 98.748 m3-nin biremediasiya olunması,26.249 m3-nin isə anbarlaşdırılması nəzərdə tutulmuşdur. Bioremediasiya prosesləri 3 sahədə ( 16 ha, 8 ha, 4 ha) aparılacaqdır. Artıq 1-ci bioremediasiya sahəsi (16 ha) hazırlanmış və şlamın daşınmasına başlanılmışdır.
QSC-nin icrasına başladığı ikinci layihə isə Ə.Əmirov adına NQÇİ-nin mədən ərazisində neftşlamın bioremediasiya edilməsidir. Bu layihə ərazisinin ümumi sahəsi 6 ha, çirklənmiş ərazilər 1 ha, neftşlamın miqdarı 17.250 m3 təşkil edir. Neftşlamın bioremediasiyasının 5 ha ərazidə aparılması planlaşdırılmışdır. Hazırda layihə üzrə neftşlamın bioremediasiya sahəsinə daşınması işləri yerinə yetirilir. Qala gölünün ətrafının neftşlamdan təmizlənməsi layihəsi ilə əlaqədar neftşlamın ərazidən daşınmasına da start vermişdir.
“Ekol Mühəndislik Xidmətləri” QSC 2011-ci ildə icraatında olan ekoloji layihələrin yüksək keyfiyyətlə və nəzərdə tutulmuş müddətdə həyata keçirilməsi məqsədilə, həmin sahələrə lazım olan xüsusi texnika və işçi qüvvəsini cəlb etmiş, təcrübəli mütəxəssislər layihə rəhbərləri təyin edilmişlər.
tarix : 11.03.2011
|