Aprelin 15-də “Ekol Mühəndislik Xidmətləri” Qapalı Səhmdar Cəmiyyətinin yaranmasının 5 illiyi ilə əlaqədar bir sıra tədbirlər keçirilmişdir. Öncə ARDNŞ-nin balansında olmuş və 2009-cu ildə QSC-nin xidməti istifadəsinə verilmiş, Suraxanı rayonu, Zığ qəsəbəsi, Hövsan yolu ünvanda yerləşən qeyri-yaşayış sahəsinin açılışı olmuşdur.
Açılışda ARDNŞ-nin ekologiya üzrə vitse-prezidenti Rəfiqə Hüseynzadə, ARDNŞ-nin Təhlükəsizlik idarəsinin rəisi Rəşad Əliyev, Ekologiya İdarəsinin rəisi Azər Əliyev, Heydər Əliyev adına BNEZ-nun direktoru Elman İsmayılov, “Azərneftyağ” NEZ-nin direktoru Rövşən Həsənov, “Azneft” İB-nin baş direktorunun ekologiya üzrə müavini Faiq Cəfərov, “Ekol Mühəndislik Xidmətləri” QSC-nin kollektivi və KİV-nin nümayəndələri iştirak etmişlər.
QSC-nin baş direktoru Ramil Əliyev qeyri-yaşayış sahəsində yenidənqurma əsaslı təmir, abadlaşdırma və yaşıllaşdırma sahəsində görülmüş işlər və perspektiv planlar barədə tədbir iştirakçılarına geniş məlumat vermişdir. Ramil Əliyev bildirmişdir ki, burada QSC-nin Torpaqların rekultivasiyası departamentinin yerləşdirilməsi nəzərdə tutulmuşdur. ARDNŞ-nin vitse-prezidenti Rəfiqə Hüseynzadə və digər iştirakçılar buradakı inzibati bina, yaşıllaşdırma sahəsinin xidmət məntəqəsi və ərazi ilə yaxından tanış olmuş və görülən işlərdən razı qaldıqlarını bildirmişlər.
15 apreldə, günün ikinci yarısında QSC-nin baş ofisində 5 illiklə əlaqədar geniş toplantı keçirilmişdir. Toplantıda baş direktor Ramil Əliyev QSC-nin yaranması, fəaliyyəti və 5 ildə əldə olunan nailiyyətlər barədə geniş məruzə etmişdir. Digər çıxış edənlər də fəaliyyəti dövründə QSC-nin ARDNŞ-nin mədən ərazilərində həyata keçirdiyi əhəmiyyətli ekoloji layihələri xüsusilə vurğulamışlar. Qeyd olunmuşdur ki, daimi inkişafda olan “Ekol Mühəndislik Xidmətləri” QSC qısa müddətdə özünün maddi-texniki bazasının və peşəkar kadr personalının formalaşmasına nail olmuş və ekoloji problemlərin həlli sahəsində özünü potensial bir şirkət kimi təsdiq etmişdir. Toplantıda QSC-nin əməkdə fərqlənən bir qrup əməkdaşlarına Fəxri Fərman və pul mükafatları təqdim olunmuşdur.
Həmin gün QSC-nin 5 illiyi ilə əlaqədar ziyafət də təşkil edilmişdir. Ziyafətdə QSC-nin rəhbərliyi, kollektivin və əlaqədar təşkilatların nümayəndələri də iştirak etmişlər. Tədbirlərə “Ekol” MFK yoldaşlıq görüşləri də daxil edilmişdir.
Xatırladaq ki, “Ekol Mühəndislik Xidmətləri” Qapalı Səhmdar Cəmiyyət ARDNŞ (51%) və “Lancer Services S.A.” Şirkətinin (49%) təsisçiliyi ilə 01 mart 2006-cı il tarixdə yaradılmış və 17 aprel 2006 -cı il tarixdə hüquqi şəxs kimi dövlət qeydiyyatından keçmişdir. QSC-nin əsas fəaliyyəti respublikamızda, xüsusilə ADRNŞ-nin istehsalat sahələrində ekoloji problemlərin aradan qaldırılmasından ibarətdir.
tarix : 15.04.2011
|