“Ekol Mühəndislik Xidmətləri” QSC-nin ətraf mühitin mühafizəsi və ekoloji vəziyyətin yaxşılaşdırılması sahəsində həyata keçirdiyi uğurlu ekoloji layihələr, nanotexnologiyaların istehsalata tətbiqi və bu sahədə özünü inkişaf etmiş bir şirkət kimi təsdiq etməsi, ölkəmizdə fəaliyyət göstərən xarici şirkətlərin, beynəlxalq təşkilatların və səfirliklərin böyük marağına səbəb olmuşdur. Məhz bunun nəticəsidir ki, son bir ildə qeyd edilən təşkilatların nümayəndələri ilə QSC-də tez-tez görüşlər keçirilir, qarşılıqlı əməkdaşlıq münasibətləri yaradılır və xarici əlaqələri günü-gündən genişlənir.
Belə görüşlərdən biri də aprelin 21-də, QSC-nin baş ofisində İngiltərənin Azərbaycandakı səfirinin 2-ci katibi, Ticarət və Enerji Şöbəsinin müdiri xanım Ann Herdlə baş direktor Ramil Əliyev arasında keçirilmişdir. Görüş zamanı xanım Ann Herd qeyd etmişdir ki, Azərbaycanda fəaliyyət göstərən bir çox ekoloji yönümlü şirkətlərlə tanış olmuş, lakin “Ekol Mühəndislik Xidmətləri” QSC-nin fəaliyyəti və gördüyü işlər onda daha çox maraq doğurmuşdur. Elə bu səbəbdən də QSC-nin fəaliyyəti ilə daha yaxından tanış olmaq üçün bu görüşün keçirilməsinə təşəbbüs göstərmişdir.
QSC-nin baş direktoru Ramil Əliyev qonağı səmimi salamlayaraq, QSC-nin yaranması tarixi, təsisçiləri və fəaliyyəti haqqında geniş məlumat vermişdir. Baş direktor bildirmişdir ki, fəaliyyəti dövründə QSC beynəlxalq standartlar səviyyəsində müasir texnika və texnologiyaların istehsalata tətbiq edilməsini və ekologiya sahəsində dünyanın qabaqcıl təcrübələrinə yiyələnməyi qarşısına məqsəd qoymuşdur. Bu sahədə xeyli nailiyyətlər əldə edilmişdir. Hazırda neftşlamın emalı və zərərsizləşdirilməsində, sənaye–çirkab suların təmizlənməsində dünyanın tanınmış şirkətlərinin ( “Facet”, “Alfa-Laval”, “Börger” və s.) qurğuları istehsalatda uğurla tətbiq edilir.
Ramil Əliyev, ölkəmizdə neft sənayesi sahəsində fəaliyyət göstərən “BP Exploration (Caspian SEA)” LTD və “TOTAL” şirkətləri ilə tullantıların idarə olunması sahəsində sıx əməkdaşlıq münasibətlərinin qurulduğunu da qonağın diqqətinə çatdırdı. Baş direktor bildirdi ki, 2009-cu ildə “BP Exploration (Caspian SEA)” LTD-nin “Tullantıların idarə olunması xidmətlərinin göstərilməsi” layihəsi üzrə keçirdiyi tenderdə QSC-də respublikamızda fəaliyyət göstərən Hollandiyanın “AA Servicess” şirkəti ilə birlikdə iştirak etmiş və bu tenderin qalibi olmuşlar. Layihənin icrası üçün bu şirkətlərin təsisçiliyi ilə “AAS-EKOL” MMC təsis olunmuş və 01.02.2010-cu ildə dövlət qeydiyyatından keçmişdir. Hazırda “AAS-EKOL” MMC “BP Exploration (Caspian SEA)” LTD və “TOTAL” şirkətləri ilə tullantıların emalı sahəsində bir sıra ekoloji layihələr həyata keçirir.
İngiltərənin Azərbaycandakı səfirinin 2-ci katibi, xanım Ann Herd eşitdiklərindən çox məmnun olduğunu bildirdi. O, ekoloji problemlərin ümumbəşəri bir problem olduğunu, buna görə də Britaniyanın bir çox şirkətləri ilə, xüsusilə ətraf mühit sahəsində fəaliyyət göstərən şirkətlərlə QSC-nin əlaqələrinin yaradılmasını, Britaniyanın ətraf mühit ekspertləri ilə QSC-nin mütəxəssisləri arasında bilik və təcrübə mübadiləsinin aparılması məqsədilə qarşılıqlı səfərlərin təşkil olunmasının məqsədəuyğunluğunu xüsusilə vurğuladı. Xanım Ann Herd eyni zamanda QSC-nin baş direktoru Ramil Əliyevi Londona işgüzar səfərə dəvət etdi. R.Əliyev bu dəvəti məmnuniyyətlə qəbul etdi. Qarşılıqlı anlaşma və işgüzar şəraitdə keçən görüşdə qərara alındı ki, belə görüşlərin davamlı aparılmasına ehtiyac vardır.
tarix : 22.04.2011
|