İclası giriş sözü ilə QSC-nin baş direktoru, “Ekol” ilk ərazi təşkilatının sədr müavini Ramil Əliyev açaraq əvvəlcə YAP Nizami rayon təşkilatının sədrini salamlayaraq, vaxt tapıb tədbirə qatıldığına görə ona öz minnətdarlığını bildirdi. Ramil Əliyev Sədaqət Vəliyevanı millət vəkili seçilməsi münasibətilə də təbrik edərək ona bu fəaliyyətində müvəffəqiyyətlər arzuladı.
Baş direktor çıxışına davam edərək bildirdi ki, QSC 2006-cı ildə yaranmışdır. Cəmiyyətin əsas fəaliyyəti ətraf mühitin mühafizəsi və insanların sağlamlığının qorunması missiyasını həyata keçirməkdən ibarətdir. Ramil Əliyev qeyd etdi ki, QSC-nin kollektivi əsasən sağlam düşüncəli, siyasi məfkurəcə yetkin, dövlətimizin daxili və xarici siyasətini dəstəkləyən fəal insanlardan ibarətdir. Məhz buna görə də, kollektivin təşəbbüsü ilə QSC-də 2007-ci ildə yeni Azərbaycanın memarı, ulu öndərimiz Heydər Əliyevin yaratdığı Yeni Azərbaycan Partiyasının ərazi təşkilatı yaradılmışdır. Həmin ildən YAP ”Ekol” ilk ərazi təşkilatı partiyanın banisi Heydər Əliyevin ideyalarının həyata keçirilməsi istiqamətində Respublikamızın ictimai-siyasi həyatında aktiv fəaliyyətə başlamışdır.
İclasda çıxış edən YAP ”Ekol” ilk ərazi təşkilatının sədri Fəxrəddin Quliyev ərazi təşkilatının yaranması zərurətindən, təşkilatın tərkibindən və fəaliyyətindən geniş danışdı. O, bildirdi ki, ərazi təşkilatı 2007-ci ildə yaradıldığı zaman cəmi 25 nəfər üzvü vardısa, hazırda təşkilatın 200 nəfərdən çox üzvü var. Təşkilatdakı partiya üzvlərinin 45%-dən çoxunu gənclər təşkil edir. Ərazi təşkilatı respublikamızın, xüsusən Nizami rayonunun ictimai-siyasi həyatında hər zaman öz fəallığını nümayiş etdirmişdir. Bu fəallığına görə ”Ekol” ilk ərazi təşkilatı YAP Nizami rayon təşkilatının Fəxri Fərmanına layiq görülmüşdür.
Ərazi təşkilatının sədri Fəxrəddin Quliyev qeyd etdi ki, Yeni Azərbaycan Partiyasının bir siyasi partiya kimi nüfuzunun günü-gündən artması, YAP-nın sədri Azərbaycan Respublikasının Prezidenti möhtərəm İlham Əliyevin düzgün iqtisadi-siyasi kursu, eləcə də dövlətimizin dinamik inkişafı Azərbaycan xalqını, xüsusən gəncləri YAP ətrafında daha da sıx birləşdirir.
QSC-nin baş direktorunun istehsalat üzrə müavini-texniki direktor Məzahir Hüseynov, baş direktorun məsləhətçisi Kamil Akimov, Ekoloji Monitorinq departamentinin rəisi, ”Ekol” ilk ərazi təşkilatının sədr müavini Şahabiddin Albuşov və Həmkarlar İttifaqı Komitəsinin sədri Əli Ələkbərov iclasda çıxış etdilər. Çıxış edənlər, YAP-nın ölkəmizin dinamik iqtisadi inkişafında, dövlət və vətəndaş cəmiyyəti quruculuğu prosesində, eləcə də xarici və daxili siyasətindəki əvəzedilməz fəaliyyətini qeyd etdilər. Bu sahədə öz fəallığı ilə fərqlənən YAP Nizami rayon təşkilatının rolu və rayonun ictimai-siyasi həyatında ”Ekol” ilk ərazi təşkilatının da həmişə fəal olduğu xüsusilə vurğulandı.
Sonda YAP Nizami rayon təşkilatının sədri, millət vəkili Sədaqət Vəliyeva geniş məzmunlu çıxış etdi. Millət vəkili qeyd etdi ki, 1992-ci ildə Milli liderimiz Heydər Əliyevin çox çətin bir şəraitdə yaratdığı Yeni Azərbaycan Partiyası öz fəaliyyəti dövründə və Prezident cənab İlham Əliyevin siyasi kursun layiqincə davam etdirməsi nəticəsində YAP təkcə respublikamızda deyil, bütün regionda özünü nüfuzlu, lider partiya kimi təsdiq etmişdir. Azərbaycan xalqı YAP-nın daxili və xarici siyasətini dəstəkləyir və partiya ətrafında daha da sıx birləşirlər. Məhz bunun nəticəsidir ki, ötən il noyabrın 7-də Azərbaycan Respublikasının Milli Məclisinə keçirilmiş seçkilərdə YAP böyük üstünlüklə qalib gəldi. Elə mənim də millət vəkili seçilməyim YAP Nizami rayon təşkilatının və onun ərazi təşkilatlarının ictimai-siyasi fəaliyyətinin əhali tərəfindən düzgün və layiqincə qiymətləndirilməsinin təzahürüdür.
Sədaqət Vəliyeva bildirmişdir ki, YAP Nizami rayon təşkilatları içərisində ”Ekol” ilk ərazi təşkilatı öz fəallığı ilə həmişə öndə olmuşdur. Daimi inkişafda olan ərazi təşkilatında siyasi yetkinliyi və intellektual səviyyəsi ilə fərqlənən insanlar çoxdur. Nizami rayonunu bütün tədbirlərində ”Ekol” ilk ərazi təşkilatının həmişə fəal iştirak etmişdir. Bunun üçün Sizin hər birinizə öz təşəkkürümü bildirirəm. Və əminəm ki, həmişə olduğu kimi ”Ekol” ilk ərazi təşkilatı, bundan sonra da YAP siyasi kursuna sadiqliyini nümayiş etdirəcək və respublikamızın dinamik inkişafında öz layiqli töhfələrini verəcəkdir. Sizə şərəfli fəaliyyətinizdə uğurlar diləyirəm.
İclasda YAP sıralarına yeni qəbul olunmuş QSC-nin bir qrup işçilərinə üzvlük vəsiqələri təqdim edilmişdir. Bununla da YAP Nizami rayon ”Ekol” ilk ərazi təşkilatının növbəti iclası başa çatmışdır.