|
“Ekol Mühəndislik Xidmətləri” QSC-nin təsisçiləri olan ARDNŞ-nin və “Lanser Services S.A.” şirkətinin rəhbərlərinin birgə qərarına əsasən, may ayının 4-dən Rəşad Fail oğlu İsmayılov QSC-nin baş direktorunun SƏTƏM üzrə müavini təyin edilmişdir.
Yeni təyinatla əlaqədar mayın 4-də QSC-nin baş ofisində təqdimat mərasimi keçirilmişdir. Mərasimdə çıxış edən baş direktor Ramil Əliyev qeyd etmişdir ki, QSC-nin maddi-texniki bazasının və kadr potensialının gücləndirilməsi daimi təsisçilərin rəhbərlərinin diqqət mərkəzindədir. Bu yeni təyinat da həmin diqqətin məntiqi davamıdır. Bunun üçün bir daha təsisçilərimizin rəhbərlərinə öz dərin minnətdarlığımı bildirirəm.
Çıxışına davam edən Ramil Əliyev, yeni təyin olunmuş SƏTƏM üzrə baş direktorun müavini Rəşad İsmayılovun həyat və fəaliyyəti haqqında mərasim iştirakçılarına məlumat verdi. O, bildirdi ki, Rəşad İsmayılov intellektual səviyyəli və zəngin təcrübəyə malik, potensial imkanlı bir mütəxəssisdir. O, bir çox təşkilatlarda rəhbər vəzifələrdə çalışıb. İnanıram ki, onun QSC-də fəaliyyətə başlaması ilə ekologiya, təhlükəsizlik texnikası və nanotexnologiyaların istehsalata tətbiqi sahəsində yeni-yeni nailiyyətlər əldə edəcəyik. Baş direktor yeni təyinat münasibətilə Rəşad İsmayılovu təbrik etmiş və ona bu fəaliyyətində uğurlar arzulamışdır.
Mərasimdə çıxış edənlər, baş direktorun istehsalat üzrə müavini-texniki direktor Məzahir Hüseynov, baş direktorun ümumi işlər üzrə müavini İsrafil Əliyev, baş direktorun məsləhətçisi Kamil Akimov, Maliyyə və uçot departamentinin rəisi Əli Bağışov, Ekoloji monitorinq departamentinin rəisi Şahabiddin Albuşov, İctimai sosial şöbənin rəisi Fəxrəddin Quliyev və digərləri yeni təyinat münasibətilə Rəşad İsmayılovu təbrik etmiş, ona gələcək fəaliyyətində uğurlar diləmişlər.
Rəşad İsmayılov çıxışında ona göstərilən yüksək etimada görə ARDNŞ-nin və “Lanser Services S.A.” şirkətinin rəhbərliyinə öz dərin təşəkkürünü bildirmiş, bu etimadı doğrultmaq üçün bütün bilik və bacarığını sərf edəcəyini mərasim iştirakçılarının diqqətinə çatdırmışdır.
 İsmayılov Rəşad Fail oğlu - 07 iyun 1974 - cü ildə Bakı şəhərində anadan olub. 1991-ci ildə Bakı şəhərində orta təhsilini başa vurub. 1996-cı ildə M.Ə. Rəsulzadə adına Bakı Dövlət Universitetinin Hüquq fakültəsini fərqlənmə diplomu ilə bitirərək hüquqşünas ixtisasına yiyələnib. 2001-2003-cü illərdə Azərbaycan Dövlət İqtisad Universitetinin Maliyyə Kredit fakültəsində iqtisadçı ixtisası üzrə ikinci ali təhsil alıb. Bir çox xarici dövlətlərdə təkmilləşdirmə kursları keçib.
1996-2000-ci illərdə Azərbaycan Respublikasının Prezidenti yanında Xüsusi İdarədə əməliyyat müvəkkili, 2000-2003-cü illərdə Həyat Qeyri Hökumət Təşkilatı, Beynəlxalq hüquq departamentinin rəisi, 2003-2005-ci illərdə BMT-nin Azərbaycan nümayəndəliyində İnkişaf Proqramının əməkdaşı, 2005-ci ildə Parex Leasing and Factoring MMC-də Biznesin inkişafı üzrə menecer, 2005-2006-cı illərdə Parex Leasing and Factoring MMC-də Biznesin inkişafı üzrə departamentin direktoru, 2006-2008-ci illərdə Parex Leasing and Factoring MMC-nin baş direktorunun müavini, 2008-ci ildə Latviya-Azərbaycan Ticarət Palatasının rəhbəri, 2008-2009-cu illərdə Parex Leasing and Factoring MMC-nin baş direktoru, 2009-2010-cu illərdə Bank VTB (Azərbaycan) Korporativ müştərilərlə iş üzrə departamentin direktoru, 2010-cu ildə Muğan Bank ASC-nin törəmə müəssisəsi olan Muğanlizinq şirkətinin baş direktoru, 2010-cu ildə isə Latviya-Azərbaycan Ticarət Palatasının sədri vəzifələrində çalışıb.
tarix : 05.05.2011
|
ana səhifə
Satınalma
əlaqə
Futzal
Alternativ Enerji
Bu maraqlıdır
