Öz fəaliyyətini beynəlxalq standartlar səviyyəsində qurmaq “Ekol Mühəndislik Xidmətləri” QSC-nin prioritet hədəflərindəndir. Əsas fəaliyyəti ekoloji yönümlü olduğundan ilk növbədə QSC 2007-ci ildə İSO 14001 Ekologiya İdarəetmə Sistemini qəbul etmiş və sertifikata layiq görülmüşdür.
Standartlarının şərtlərinə uyğun olaraq ötən müddətdə Türk Standartları İnstitutunun auditorları tərəfindən QSC-nin Ekologiya İdarəetmə Sistemi üzrə fəaliyyəti dövrü olaraq tədqiq edilmiş və aşkar olunmuş uyğunsuzluqlar operativ olaraq aradan qaldırılmışdır.
10 may 2011-ci il tarixdə Türk Standartları İnstitutu tərəfindən “Ekol Mühəndislik Xidmətləri” QSC-də İSO 14001 Ekologiya İdarəetmə Sistemi üzrə növbəti audit keçirilmişdir.
Bu məqsədlə mayın 10-da QSC-nin baş ofisində toplantı keçirilmişdir. Toplantıda Türk Standartları İnstitutunun (TSE) Azərbaycan təmsilçiləri Hasan Demirtaş, Xatirə Salahova, Namiq Həsənov və TSE-nin baş auditoru Yılmaz Eraslan, QSC-nin rəhbərliyi, struktur bölmələrinin rəhbərləri və mühəndis-texniki işçilər iştirak etmişlər.
QSC-nin Baş direktoru Ramil Əliyev qonaqları səmimi salamlayaraq ötən dövr ərzində Ekologiya İdarəetmə Sisteminin tələblərinə uyğun olaraq görülmüş işlər barədə onlara ətraflı məlumat vermişdir. Türk Standartları İnstitutunun təmsilçiləri QSC-nin İSO 14001 standartları sahəsində gördüyü işlərdən və keçirdikləri auditlərin nəticələrindən razı qaldıqlarını qeyd etmişlər. TSE təmsilçiləri sonuncu auditin nəticələrinin də uğurlu olduğunu, QSC-də İSO-14001 Standartlarının tələblərinə tam əməl edildiyini vurğulamış, bu sahədə olan yeniliklərlə bağlı öz tövsiyələrini vermişlər. Sertifikatın yeniləşməsi ilə əlaqədar QSC-nin rəhbərliyini və kollektivini təbrik edərək onlara gələcək fəaliyyətlərində uğurlar arzulamışlar.
Baş direktor Ramil Əliyev TSE təmsilçilərinə öz adından və kollektiv adından təşəkkürünü bildirərək, daim inkişafda olan QSC-nin fəaliyyətinin bundan sonra da bütün sahələrdə beynəlxalq standartların tələblərinə uyğun qurulacağını və Türk Standartları İnstitutu ilə əməkdaşlığın uğurla davam etdiriləcəyini qeyd etmişdir. Baş direktor QSC-nin gələcəkdə İSO 9001 və OHSAS 18001 Beynəlxalq Standartlarının da qəbul etməsini məqsədəuyğun hesab etdiyini və bu istiqamətdə hazırlıq işlərinin görüldüyünü türkiyəli qonaqların diqqətinə çatdırmışdır. TSE təmsilçiləri bu sahədə QSC-nə hər zaman dəstək olmağa hazır olduqlarını qeyd etmişlər.
QSC-nin baş direktoru Ramil Əliyev “Ekol Mühəndislik Xidmətləri” QSC-nin rəmzi hədiyyələrini qonaqlara təqdim etmişdir. Bununla da toplantı başa çatmışdır.
tarix : 12.05.2011
|