2011-ci ildə “Ekol Mühəndislik Xidmətləri” QSC “Abşeronneft”, “Balaxanıneft”(2-ci mədən) və Ə.Əmirov adına NQÇİ-nin mədən ərazilərində, eləcə də Z.Tağıyev adına NQÇİ-nin köhnə Qala yatağında neftlə çirklənmiş torpaqların rekultivasiyası, bioremediasaiyası və landşaftın bərpası layihələrinin icrasına başlamışdır.
Hazırda bütün layihələr üzrə işlər yüksək templə aparılır. Ə.Əmirov adına NQÇİ- də və “Balaxanıneft” NQÇİ-nin 2-cü mədən ərazisində, eləcə də Z.Tağıyev adına NQÇİ-nin ərazisindəki köhnə Qala yatağında neftşlamın çıxarılması, ştib və torpağın yayılması işləri başa çatdırılmışdır. ”Balaxanıneft” NQÇİ-nin 4-cü mədən ərazisində isə rekultivasiya işləri yerinə yetirilməkdədir. Bununla yanaşı, “Abşeronneft”, “Balaxanıneft”( 2-ci mədən ) və Ə.Əmirov adına NQÇİ-nin mədən ərazilərində neftşlamın bioremediuasiyası prosesləri də davam etdirilir.
May ayının 17-də isə Z.Tağıyev adına NQÇİ-nin ərazisindəki köhnə Qala yatağında neftlə çirklənmiş torpaqların rekultivasiyası və landşaftın bərpası layihəsinin 2-ci mərhələsinə başlanılmış, ”Abşeronneft” NQÇİ-nin reabilitasiya olunmuş mədən ərazisində salınmış yaşıllıqların suvarılması üçün yeni su xətləri çəkilmişdir.
Görülən işlər nəticəsində yaşayış məntəqəsi ilə əhatə olunmuş layihə ərazilərinin ekoloji vəziyyəti xeyli dərəcədə yaxşılaşmış, atmosferə atılan zərərli maddələrin miqdarı kifayət qədər azalmışdır. QSC-nin Torpaqların rekultivasiyası departamenti bu istiqamətdə işləri uğurla davam etdirir.
tarix : 18.05.2011
|