Neft sənayesi müəssisələrində ətraf mühitin çirklənməsinə və ekoloji tarazlığın pozulmasına təsir göstərən əsas amillərdən biri də istehsal və emal prosesləri zamanı formalaşan neftşlamdır. Odur ki, “Ekol Mühəndislik Xidmətləri” QSC öz fəaliyyəti dövründə neftşlamın ətraf mühitə mənfi təsirinin qarşısının alınması istiqamətində ən zəruri tədbirlərin həyata keçirilməsini qarşıya məqsəd qoymuşdur.
Bununla əlaqədar olaraq, QSC 2007-ci ildə İsveçin Alfa-Laval şirkətinin, gücü 30 m3/saat olan 2 ədəd 2 fazalı dekantor qurğusunu almış, elə həmin ildən “Bibiheybətneft” NQÇİ-nin mədən ərazisində, Heydər Əliyev adına BNEZ-nun və “Azərneftyağ” NEZ-nun istehsalat sahələrində uzun illər yığılıb qalmış neftşlamın emalı və zərərsizləşdirilməsi proseslərinə başlamışdır. Nəticələr uğurlu olmuş, bu sahələrdə xeyli neftşlam emal edilərək zərərsizləşdirilmişdir ki, bu da ərazinin ekoloji vəziyyətinin yaxşılaşmasına öz müsbət təsirini göstərmişdir. ?xml:namespace prefix = o /-->
Bu sahəyə daim diqqət göstərən “Ekol Mühəndislik Xidmətləri” QSC, Heydər Əliyev adına BNEZ-nun və “Azərneftyağ” NEZ-nun istehsalat sahələrində mövcud neftşlamın emalı və zərərsizləşdirilməsinin fasiləsizliyini təmin etmək və qurğuların məhsuldarlığının artırmaq məqsədilə bir sıra zəruri tədbirlər həyata keçirir. May ayında QSC-nin “Azərneftyağ“ NEZ-nun ərazisində olan “Alfa-Laval” 2 fazalı dekantor qurğusunda təmir profilaktika işləri aparılmış, qurğunun P-0, P-1, P-2 və P-3 ötürücü nasosları yenisi ilə əvəz edilmiş və istismara buraxılmışdır. Bu günlərdə analoji təmir və profilaktika işləri QSC-nin Heydər Əliyev adına BNEZ-nun ərazisində istismarda olan “Alfa-Laval” 2 fazalı dekantor qurğusunda da yerinə yetiriləcəkdir.
Bununla yanaşı, QSC neftşlamın emalı və zərərsizləşdirilməsi proseslərinə nanotexnologiyaların tətbiqi sahəsində də məqsədli işlər aparır. Qeyd edildiyi kimi, ötən ilin dekabr ayında “Ekol Mühəndislik Xidmətləri” QSC bir ədəd Hollandiya istehsalı, məhsuldarlığı 20 m3/saat olan 3 fazalı modul dekantor qurğusu almışdır. Hazırda bu qurğunun istismara verilməsi istiqamətində hazırlıq işləri görülür. Qurğu üçün transformator binası tikilib başa çatdırılmış və beton platforma hazırlanmışdır. Yaxın günlərdə qurğunun quraşdırılmasına başlanılacaqdır. Bu qurğunun istismara verilməsi ilə neftşlamın emalı və zərərsizləşdirilməsi prosesləri təkmilləşəcək və məhsuldarlıq xeyli dərəcədə artırılacaqdır. Nəticədə NEZ-nın ərazilərində ekoloji vəziyyət hiss olunacaq qədər yaxşılaşacaqdır.
tarix : 26.05.2011
|