Respublikamızın ərazisində, xüsusilə neft sənayesi sahələrində ekoloji problemlərin operativ və dünya standartları səviyyəsində həll olunması ən aktual məsələlərdən biridir. Bununla əlaqədar olaraq, ARDNŞ-nin fəaliyyət sahələrində neftlə çirklənmiş torpaqların təmizlənməsi işləri geniş vüsət almış, 100 hektarlarla torpaq sahələri reabilitasiya edilərik landşaftın bərpası təmin olunmuşdur. Bu layihələrin həyata keçirilməsində “Ekol Mühəndislik Xidmətləri” QSC də potensial podratçı qismində yaxından iştirak edir.
Həyata keçirdiyi ekoloji layihələrin dünya standartlarına cavab verən səviyyədə icra edilməsi məqsədilə, QSC dünyada fəaliyyət göstərən analoji şirkətlərin qabaqcıl təcrübələrindən bəhrələnməyə, müasir texnika və texnologiyalardan istifadə etməklə maddi-texniki bazasının gücləndirilməsinə böyük önəm verir. Hazırda QSC-nin texniki parkında neftşlamın emalı və zərərsizləşdirilməsi, eləcə də çirkab suların təmizlənməsi sahəsində dünyanın müxtəlif ölkələrinin ən müasir qurğuları istismar edilir və yüksək nəticələr əldə olunur.
Odur ki, xarici əlaqələrin genişləndirilməsi, analoji şirkətlərlə əməkdaşlıq əlaqələrinin qurulması, yeni texnika və texnologiyaların istehsalata tətbiq olunması QSC-nin fəaliyyətinin prioritet istiqamətlərindən biridir. Elə bu məqsədlə də QSC-nin baş direktoru Ramil Əliyev, baş direktorun istehsalat üzrə müavini-texniki direktor Məzahir Hüseynov, Marketinq və xarici iqtisadi əlaqələr şöbəsinin rəisi Rövşən Fətullayev iyunun 23-dən 26-dək İtaliyanın Luqo şəhərində xidməti ezamiyyətdə olmuşlar.
Ezamiyyə müddətində QSC rəhbərliyi 1923-cü ildən Luqo şəhərində fəaliyyət göstərən və dünyada tanınmış “Diemme S.P.A” şirkətində olmuş və bu şirkətin rəhbərliyi ilə işgüzar görüş keçirmişlər. Tərəflər öz fəaliyyət sahələri ilə biri-birlərinə geniş məlumat vermiş, qarşılıqlı əməkdaşlıq əlaqələrinin bəzi məqamları müzakirə edilmişdir. Sonra, QSC rəhbərliyi “Diemme S.P.A” şirkətinin istehsalı olan “Neftlə çirklənmiş torpaqların yuma üsulu ilə təmizləmə qurğusu” ilə yaxından tanış olmuşlar. Şirkətin əməkdaşları tərəfindən qurğunun iş prinsipi və texniki göstəriciləri haqqında QSC rəhbərliyinə ətraflı məlumat verilmişdir. Qurğunun məhsuldarlığı, iqtisadi səmərəliliyi və texnoloji xüsusiyyətləri böyük maraq doğurmuşdur.
Görüşdə qərara alınmışdır ki, “Diemme S.P.A” şirkətinin mütəxəssisləri Azərbaycana gələrək şəraitlə yerində tanış olsunlar və bu istiqamətdə ikitərəfli görüşlər davam etdirilsin. Nəzərdə tutulmuşdur ki, yerli şərait qiymətləndirildikdən və qarşılıqlı şərtlər razılaşdırıldıqdan sonra qurğu barədə təkliflər paketi QSC-yə təqdim edilsin.
İyunun 26-da QSC-nin rəhbərliyi xidməti ezamiyyətlərini başa vuraraq Bakıya qayıtmışlar.
tarix : 29.06.2011
|