İyulun 1-də ARDNŞ-nin vitse-prezidenti Rəfiqə Hüseynzadə “Ekol Mühəndislik Xidmətləri“ QSC-nin istehsalat sahələrinə baxış keçirmiş, istehsalat sahələrindəki qurğu və avadanlıqlarla, eləcə də neftşlamın emalı və zərərsizləşdirilməsi, parafinin və sənaye-çirkab sularının təmizlənməsi prosesləri ilə tanış olmuşdur. Öncə ADNŞ-nin vitse-prezidentinə QSC-nin O.Vəliyev 1 ünvanında fəaliyyət göstərən Tullantıların emalı departamentinin 6-cı sahəsindəki qurğuların iş prinsipi və texnoloji proseslər barədə ətraflı məlumat verilmişdir. Qeyd olunmuşdur ki, bu sahədə bir ayda Heydər Əliyev adına BNEZ-dan daxil olan 1-1.2 milyon m3-ə qədər sənaye-çirkab suları müasir texnologiyalarla təmizlənərək, bir hissəsi texniki məqsədlər üçün zavodun təkrar istifadəsinə verilir, bir hissəsi isə bioloji təmizləmə qurğularına ötürülür. Sahədə ay ərzində 2 min m3-ə qədər neftşlam emal olunaraq zərərsizləşdirilir. Parafin təmizləmə sexində isə ay ərzində QSC-nin təsisçiliyi ilə yaradılmış AAS-EKOL MMC-dən qəbul edilmiş 150-200 tona qədər ərsin parafini təmizlənir. İstehsalat prosesləri ilə tanışlıq zamanı vitse-prezidenti maraqlandıran suallar cavablandırılmışdır. R. Hüseynzadə QSC-nin O.Vəliyev 1 ünvanında yerləşən struktur bölmələrində çalışan işçilərin əmək şəraiti ilə də maraqlanmışdır.
Sonra ARDNŞ-nin ekologiya üzrə vitse-prezidentini QSC-nin “Azərneftyağ” NEZ-nun ərazisindəki Tullantıların emalı departamentinin 7-ci sahəsinə baş çəkmişdir. Baş direktor Ramil Əliyev burada görülən işlər barədə vitse-prezidentə ətraflı məlumat vermiş, onu sahədəki qurğular və texnoloji proseslərlə yaxından tanış etmişdir. Bildirilmişdir ki, bu sahədə bir ayda “Azərneftyağ” NEZ-da texnoloji proseslər zamanı formalaşan 1 milyon m3-ə qədər sənaye –çirkab sulara norma həddinə qədər təmizlənir, 1 min m3-ə qədər neftşlam emal edilərək zərərsizləşdirilir.
“Ekol Mühəndislik Xidmətləri“ QSC-nin baş direktoru Ramil Əliyev istehsalat sahələri ilə tanışlıqla yanaşı, QSC-nin hazırda neft-qaz çıxarma idarələrinin mədən ərazilərində torpaqların rekultivasiyası və bioremediasaiyası sahəsində yerinə yetirdiyi layihələr barədə də vitse-prezidentə ətraflı məlumat vermişdir.
QSC-nin istehsalat sahələrində görülən işlər, həmçinin, neftşlamın emalı və zərərsizləşdirilməsinin, parafinin və sənaye-çirkab suların təmizlənməsinin müasir texnika və texnologiyalarla həyata keçirilməsi, istehsalat proseslərində İSO 14001 standartlarına tam əməl olunması ARDNŞ-nin vitse-prezidentinin diqqətini cəlb etmişdir. Rəfiqə Hüseynzadə bu görüşün ona yaxşı təəssürat bağışladığını və son illərdə QSC-nin ekologiya sahəsində həyata keçirdiyi layihələrin təqdirə layiq olduğunu böyük razılıq hissi ilə vurğulamışdır. O, bu işlərin bundan sonra da davam etdiriləcəyinə əmin olduğunu, bunun üçün mümkün variantların birlikdə araşdırılacağını və həyata keçiriləcəyini xüsusilə qeyd etmişdir.
Baş direktor Ramil Əliyev vaxt tapıb QSC-nin fəaliyyəti ilə maraqlandığına görə Rəfiqə Hüseynzadəyə öz dərin təşəkkürünü bildirmiş, QSC-nin fəaliyyətinin daimi ARDNŞ-nin diqqət mərkəzində olduğunu və bu dəstəyin davamlı olacağına əminliyini minnətdarlıq hissi ilə ifadə etmişdir. O, tarixi ənənələrə söykənən neft sənayesində ekoloji problemlərin aktuallığına diqqət çəkərək, bu problemlərin həllində "Ekol Mühəndislik Xidmətləri" QSC-nin hər zaman fəal olacağını vurğulamışdır.
Görüşün sonunda ARDNŞ-nin vitse-prezidenti Rəfiqə Hüseynzadə QSC-nin ümumi fəaliyyətindən razı qaldığını bildirmiş və perspektiv planlarla bağlı öz tövsiyə və tapşırıqlarını vermişdir.
tarix : 01.07.2011
|