ARDNŞ-nin istehsalat sahələrində “Ekol Mühəndislik Xidmətləri” QSC-nin ekoloji yönümlü fəaliyyəti günü-gündən genişlənməkdədir. Bu işlərin davamı olaraq,  ARDNŞ-nin  “Neft Kəmərləri” idarəsi ilə bağlanmış müqaviləyə əsasən  QSC  Dübəndi neft terminalında  da fəaliyyətə  başlamışdır.

   Müqavilənin şərtlərinə əsasən, “TOPAS” tipli biotəmizləyici, “VEW System Specification” tipli separator, və “OSS-500”  sistemli neftşlam emal edən qurğulardan istifadə edilməklə, QSC tərəfindən fasiləsiz olaraq terminalda  formalaşan məişət-təsərrüfat, çirkab axıntı və neftlə çirklənmiş axıntı sularının təmizlənməsi, eləcə də  neftşlamın emalı və zərərsizləşdirilməsi nəzərdə tutulmuşdur.

   Bununla əlaqədar olaraq, QSC-nin Tullantıların emalı departamentinin 5-ci sahəsi ilk növbədə  Dübəndi terminalındakı istehsalat sahəsində  abadlaşdırma, təmizləyici qurğularda və qazanxanada isə  təmir profilaktika işlərini  həyata keçirmişdir. Sahə  texniki vasitələrlə və işçi qüvvəsi ilə təmin olunmuş, cari ilin may ayından işlərə start verilmişdir.

   Yeni istehsalat sahəsində  təlimata uyğun olaraq təhlükəsizlik texnikası üzrə də bütün lazımı tədbirlər görülmüş, ərazi  tələb olunan plakatlar və yanğından mühafizə vasitələri ilə təmin edilmişdir.

   “Neft Kəmərləri” idarəsinin  Dübəndi neft terminalında işlər müqavilə şərtlərinə uyğun olaraq davam etdirilir.

tarix : 06.07.2011