QSC-nin əsas sifarişçilərindən olan Heydər Əliyev adına BNEZ-nun və "Azərneftyağ" NEZ-nun istehsalat sahələrinin yaşayış məntəqələrinə yaxın və əhalinin sıx yaşadığı ərazilərdə yerləşməsi isə, bu zavodlardan atılan tullantıların təmizlənməsinə və zərərsizləşdirilməsinə xüsusi yanaşma metodları və yeni texnologiyaların tətbiqi zərurətini doğurur. Bu məqsədlə QSC-nin istehsalat sahələrində olan mövcud mexaniki təmizləyici qurğuların məhsuldarlığının artırılması və yeni qurğuların alınıb quraşdırılması istiqamətində zəruri tədbirlər görülür.
2006-cı ildən başlayaraq orta hesabla bir ildə Heydər Əliyev adına BNEZ-nun 12 milyon m3-dən artıq, "Azərneftyağ" NEZ-dan isə 11 milyon m3-ə qədər sənaye çirkab suları norma həddinə qədər təmizlənir və il ərzində hər iki zavodun istehsalat sahələrində 40 min tona qədər neftşlam emal edilərək zərərsizləşdirilir ki, bu da ətraf mühitə atılan zərərli maddələrin miqdarını xeyli dərəcədə azaldır. ARDNŞ-nin neft-qaz çıxarma idarələrinin mədən ərazilərində aparılan torpaqların rekultivasiyası və bioremediasiyası işləri də QSC-nin son illərdə ekoloji vəziyyətin yaxşılaşdırılması sahəsində həyata keçirdiyi mühüm tədbirlərdəndir.
Bununla yanaşı QSC bir çox "Sifarişçi" təşkilatların istehsalat sahələrində ekoloji monitorinq işləri apararaq, ekoloji cəhətdən təmiz istehsalatın təşkilinə dair öz təkliflərini verir və bu təşkilatların ərazilərində olan tullantıların daşınıb təmizlənməsinə yaxından köməklik göstərir ki, bu da ətraf mühitin mühafizəsinə xidmət edir.
"Ekol Mühəndislik Xidmətləri" QSC ARDNŞ-nin istehsalat sahələrində ekoloji vəziyyətin yaxşılaşdırılması sahəsində məqsədyönlü tədbirlərini davam etdirir.