Hər bir müəssisə və təşkilatın ekoloji siyasətinin düzgün müəyyənləşdirilməsi və idarə edilməsi üçün əsaslandırılmış ekoloji normativ-texniki sənədlər toplusunun olması vacib şərtlərdən biridir. Bununla əlaqədar olaraq, “Ekol Mühəndisli Xidmətləri” QSC-nin Ekoloji Monitorinq Departamentinin “Normativ-texniki sənədlərlə iş şöbəsi tərəfindən 2006-cı ildən başlayaraq, ARDNŞ-nin 30-dan çox təşkilatlarının 70-dən çox normativ-texniki sənədləri yüksək səviyyədə işlənib hazırlamış və aidiyyəti dövlət orqanları ilə razılaşdıraraq sifarişçilərə təhvil verilmişdir.
2011-ci ilin birinci yarım illiyində də Normativ-texniki sənədlərlə iş şöbəsi ekoloji normativ–texniki sənədlərin işlənib hazırlanması sahəsində xeyli iş görmüş və vəzifə öhdəliklərini layiqincə yerinə yetirmişdir. Belə ki, cari ilin 6 ayı ərzində Azərbaycan Respublikası Dövlət Neft Şirkətinin Sosial İnkişaf İdarəsi ilə “Ekol Mühəndisli Xidmətləri” QSC arasında “Lənkəran Müalicə Diaqnostika Mərkəzi və Şirvan Müalicə Diaqnostika Mərkəzi üçün ekoloji normativ-texniki sənədlər toplusunun (ekoloji pasport, yol verilən atqı həddi normativləri layihəsi, tullantı mənbələrinin və tullantıların inventarlaşdırılması) işlənib hazırlanması” haqqında bağlanmış müqaviləyə əsasən, hər bir Müalicə Diaqnostika Mərkəzi üçün 3 sənəd olmaqla 6 sənəd işlənib hazırlanmış və baxılmaq üçün sifarişçiyə təqdim edilmişdir. Bundan başqa, 2011-ci ildə “Bibiheybətneft” NQÇİ, N.Nərimanov adına NQÇİ, “Neft Daşları” NQÇİ üçün Yol Verilən Axıntı Həddi və Qaraçuxur İriləşdirilmiş Neft Mədəni üçün Ekoloji Pas¬port, Yol Verilən Atqı Həddi, Yol Verilən Axıntı Həddi normativ-texniki sənədlərinin işlənib hazırlanması haqqında “Azneft” İstehsalat Birliyi ilə “Ekol Mühəndislik Xidmətləri” QSC arasında müqavilə imzalanmışdır. Normativ-texniki sənədlərlə iş şöbəsi operativ olaraq müqavilə üzrə işlərin icrasına başlamış və bir çox sənədlərin işlənib hazırlanmasına nail olmuşdur. Müvafiq dövr ərzində “Azneft” İB “Bibiheybətneft” NQÇİ-nin və N.Nərimanov adına NQÇİ-nin Yol Verilən Axıntı Həddi Normativləri layihələrinin işlənib hazırlanması başa çatdırılmış və sənədlər sifarişçilərə təhvil verilmişdir. “Neft Daşları” NQÇİ üçün Yol Verilən Axıntı Həddi Normativləri layihəsinin və Qaraçuxur İriləşdirilmiş Neft Mədəni üçün ekoloji pasport, Yol Verilən Atqı Həddi, Yol Verilən Axıntı Həddi Normativləri layihələrinin işlənib hazırlanması üzrə işlər isə təqvim planına uyğun olaraq davam etdirilir. Hesabat dövründə “Bahar Enerji Əməliyyat Şirkəti”nin müraciətinə əsasən, həmin Şirkəti üçün ekoloji pasport, Yol Verilən Axıntı Həddi Normativləri layihəsi, Yol Verilən Atqı Həddi Normativləri layihəsi, Atmosferə zərərli maddələrin atqı mənbələrinin inventarlaşdırılması və digər ekoloji normativ-texniki sənədlərin işlənib hazırlanması məqsədilə, Normativ-texniki sənədlərlə iş şöbəsi müqavilənin tərtibatı və rəsmiləşdirilməsi üzrə iş aparmışdır. Bununla yanaşı, “Azneft” İB-nin rəsmi müraciəti ilə əlaqədar olaraq, Muradxanlı İriləşdirilmiş Neft Mədəni üçün Yol Verilən Atqı Həddi Normativləri Layihəsinin işlənib hazırlanması üçün şöbə tərəfindən müqavilənin tərtibatı və rəsmiləşdirilməsi üzrə hazırlıq işləri də görülmüşdür.
tarix : 18.07.2011
|