“Ekol Mühəndislik Xidmətləri” QSC-nin illik iş planlarına və “Sifarişçi” təşkilatlarla bağlanmış müqavilə öhdəliklərinə uyğun olaraq, Ekoloji Monitorinq Departamentinin (EMD) Səyyar monitorinq xidməti (SMX) də 2011-ci ilin I-ci yarım ili ərzində üzərinə düşən vəzifələri layiqincə yerinə yetirmişdir. SMX-nin apardığı monitorinqlər zamanı əsas istiqamət, istehsalat sahələrindən atmosferə atılan zərərli maddələrin azalmasına, təmizləyici qurğuların effektliyinin artırılmasına və istehsalat prosesləri zamanı formalaşan tullantıların idarə olunmasına müsbət təsir göstərəcək tədqiqat işlərinə və səmərəli nəticələrin əldə edilməsinə yönəldilmişdir.
SMX cari ilin 6 ayı ərzində QSC-nin “Sifarişçi” təşkilatlarının istehsalat sahələrində mütəmadi olaraq kompleks ekoloji monitorinq işlərini uğurla həyata keçirmişdir. Cari ilin I-ci yarım illiyində “Azneft” İB-nin “28 May” NQÇİ, “Neft Daşları” NQÇİ, “Abşeronneft” NQÇİ, “Balaxanıneft” NQÇİ və N.Nərimanov adına NQÇİ-də aparılmış monitorinq müşahidə məlumatları, ətraf mühitə təsir dərəcəsindən asılı olaraq diferensiallaşdırılmış və onların ekosistemə təsirinin azaldılması məqsədilə konkret təkliflər hazırlanaraq “Sifarişçi”yə təqdim olunmuşdur. Monitorinqlər zamanı istehsalat sahələrində formalaşan axıntı sularından nümunələri götürülmüş, neft məhsulları, pH, fenollar, OBT5, SSAM, NO3 və asılı maddələr üzrə analitik təhlillər aparılması üçün EMD-nin Kompleks Tədqiqatlar Laboratoriyasına (KTL) təqdim olunmuşdur. Təhlillərin nəticələrinə uyğun olaraq çatışmamazlıqların aradan qaldırılması üçün “Sifarişçi”yə təkliflər verilmişdir.
Müvafiq dövr ərzində SMX “Kompleks Qazma İşləri” Trestinin qazma rayonlarında da kompleks monitorinq işlərini həyata keçirmişdir. Trestin “Qazmaservis və Loqistika” İdarəsi, “Tomponaj” İdarəsi”, “Abşeron” Qİİ və “Qobustan” Qİİ-də aparılan monitorinq işləri zamanı diqqət su əsaslı şlamın atılma texnologiyasına, kimyəvi əsaslı şlamın yığılıb ətraf mühitdən təcrid edilməsi problemlərinə və buruq axıntı sularının yığılıb zərərsizləşdirilməsinə yönəldilmişdir. Monitorinqlər aparılarkən bu təşkilatların istehsalat sahələrindəki axarlardan su nümunələri götürülmüş, neft məhsulları, pH, fenollar, OBT5, SSAM, NO3 və asılı maddələr üzrə analitik təhlillər aparılması üçün KTL-na təqdim olunmuşdur. Bütün Qazma İdarələrinə monitorinqin yekunlarına dair 6 aylıq hesabatlar hazırlanıb təqdim olunmuş və həmin hesabatlarda monitorinq rayonu üçün ekoloji tarazlığın təmin edilməsi məqsədi ilə zəruri tədbirlər öz əksini tapmışdır.
2011-ci ilin I-ci yarım ilində SMX, QSC tərəfindən “Azneft” İB-nin mədən ərazilərində həyata keçirdiyi “neftlə çirklənmiş sahələrin bioremediasiyası” layihələri üçün zəruri olan kompleks ekoloji monitorinq işlərini də apararaq, konkret nəticələr barədə hesabatı “Sifarişçi”yə təqdim etmişdir.
tarix : 20.07.2011
|