QSC-nin istehsalat sahələrində ekoloji vəziyyətin yaxşılaşdırılmasında yaşıllaşdırma vacib bir amil kimi həmişə diqqət mərkəzində saxlanılır və bu istiqamətdə mütəmadi olaraq məqsədyönlü tədbirlər həyata keçirilir. Bununla əlaqədar olaraq, istehsalat sahələrində zərərli tullantıların təsir dərəcəsinin azaldılmasında mühüm rol oynayan yaşıllıqların salınması, onların mühafizəsi və inkişaf etdirilməsi işləri günü-gündən genişləndirilməkdədir.
Yaşıllıqların salınması və bitkilərə aqrotexniki xidmətlərin göstərilməsini QSC-nin Torpaqların rekultivasiyası departamentinin və İnzibati təsərrüfat şöbəsi həyata keçirir. Təcrübəli mütəxəssislərinin və bağbanların fəaliyyəti nəticəsində əvvəlki illərdə olduğu kimi, bu il də istehsalat sahələrindəki ağac və bəzək kollarının sayı xeyli dərəcədə artırılmışdır. Yaşıllıqlar müasir suvarma sistemləri ilə təchiz olunmuş, mövsümü aqrotexniki xidmətlər göstərilmişdir. Bağbanların gərgin əməyi sayəsində, isti yay günlərində suvarma işlərinin müntəzəm aparılması və yaşıllıqlara aqrotexniki qulluq göstərilməsi nəticəsində istehsalat sahələri gül-çiçəyə və yaşıllıqlara bürünmüşdür.
QSC-də texnoloji proseslərinin təkmilləşdirilməsi və yeni texnologiyaların tətbiqi ilə atmosferə atılan zərərli tullantıların miqdarının azaldılması da yaşıllıqların inkişaf etməsinə öz müsbət təsirini göstərmişdir.
Bununla yanaşı, “Ekol Mühəndislik Xidmətləri” QSC-nin Torpaqların rekultivasiyası departamenti, hazırda ARDNŞ-nin bir çox fəaliyyət sahələrində, o cümlədən “Bibiheybətneft” NQÇİ-nin, “Abşeronneft” NQÇİ-nin, Z.Tağıyev adına NQÇİ-nin mədən ərazilərində və Qaradağ Qaz Emalı Zavodunun istehsalat sahələrində əkilmiş 90 minə qədər müxtəlif növ ağac, bəzək və gül kollarına yüksək səviyyədə aqrotexniki xidmətlər göstərir. Yaşıllıqların suvarılmasında damcı və çiləmə üsullarından geniş istifadə olunur ki, bu da öz səmərəli nəticələrini verməkdədir.
"Ekol Mühəndislik Xidmətləri" QSC , ekoloji vəziyyətin yaxşılaşdırılmasında və insan sağlamlığının qorunmasında yaşıllıqların roluna böyük önəm verir və bu sahəni fəaliyyətinin əsas tərkib hissəsi kimi qəbul edərək bundan sonra da bütün zəruri tədbirləri həyata keçirilməsini nəzərdə tutur.
tarix : 22.07.2011
|