Ətraf mühitin mühafizəsi və ekoloji vəziyyətin yaxşılaşdırılması sahəsində prioritet ekoloji layihələr yerinə yetirən “Ekol Mühəndislik Xidmətləri” QSC, istehsalat sahələrində çalışan işçilərin sağlamlığının və təhlükəsizliyinin təmin edilməsinə xüsusi diqqət yetirir və bu istiqamətdə məqsədyönlü tədbirlər həyata keçirir.
Ötən illərdə olduğu kimi 2011-ci ildə də beynəlxalq təcrübədən yararlanaraq, QSC-nin fəaliyyət sahələrində sağlam və təhlükəsiz əmək şəraitinin yaradılması, bədbəxt hadisələrin və qəzaların qarşısının alınması, əmək şəraitinin müntəzəm surətdə yaxşılaşdırılması sahəsində bir çox işlər görülmüşdür. Məhz bu tədbirlərin nəticəsidir ki, son illərdə QSC-nin fəaliyyət sahələrində heç bir bədbəxt hadisə və qəza halları baş verməmişdir. Təhlükəsiz əmək şəraitinin yaradılması, bədbəxt hadisələrin və qəzaların qarşısının alınması məqsədilə, QSC-nin Texniki təhlükəsizlik şöbəsi (TTŞ) tərəfindən bütün fəaliyyət sahələri lazımı təlimatlarla, izahedici və xəbərdaredici plakatlarla, eləcə də, yanğın təhlükəsizliyi üçün zəruri vasitələrlə təmin edilmişdir. TTŞ vaxtaşırı olaraq QSC-nin fəaliyyət sahələrində texniki təhlükəsizlik üzrə monitorinqlər aparmış, müəssisədə çalışan işçilərə mütəmadi olaraq texniki təhlükəsizlik üzrə təlimatlar keçmişdir. QSC-nin baş direktorunun SƏTƏM üzrə müavini Rəşad İsmayılovun rəhbərliyi ilə bütün istehsalat sahələrində, əməyin mühafizəsinə nəzarət gücləndirilmiş və yeni nəzarət sistemi yaradılmışdır. İşçilərin fərdi mühafizə vasitələri və xüsusi geyimlərlə təmin edilməsi məsələləri operativ olaraq həll olunmuşdur. İnsanların və dövlət əmlakının yanğından mühafizəsinin təmin edilməsi məqsədilə sahələr bütün zəruri avadanlıqlarla təmin edilmişdir. QSC-nin Tullantıların emalı departamentinin 6-cı ( Heydər Əliyev adına BNEZ-nun 9-cu sexinin ərazisi) və 7-ci ( “Azərneftyağ” NEZ-nun 8-ci sexinin ərazisi) sahələrində yanğından mühafizə sistemləri yenidən qurulmuşdur.
tarix : 27.07.2011
|