“Ekol Mühəndislik Xidmətləri” QSC-nin fəaliyyətinin əsas istiqamətlərindən biri də neftlə çirklənmiş torpaqların təmizlənməsidir. Bu sahədə QSC fəaliyyətini həyata keçirən Torpaqların Rekultivasiyası Departamenti (TRD) tərəfindən, ötən illərdə ARDNŞ-nin fəaliyyət sahələrində 100 hektarlarla çirklənmiş torpaq sahələri təmizlənmiş və həmin ərazilərdə landşaftın bərpası təmin olunmuşdur.
2011-ci ildə də TRD ARDNŞ nin fəaliyyət sahələrində, o cümlədən “Balaxanıneft” NQÇİ-nin 2-ci və 4-cü, Ə.Əmirov adına NQÇİ-nin 3-cü, H,Z,Tağıyev adına NQÇİ-nin 2-ci və 4-cü mədən ərazilərində, həmçinin Qaraçuxur İNM (iriləşmiş neft mədənləri) mədən ərazisində çirklənmiş torpaqların rekultivasiyası və bioremediasiyası layihələrini uğurla həyata keçirmiş və müqavilə öhdəliklərinə layiqincə əməl etmişdir.
Cari ilin müvafiq dövrü ərzində QSC-nin xüsusi texnika və nəqliyyat vasitələri ilə TRD tərəfindən layihə ərazilərindən bioremediasiya sahələrinə 129 min 663 m3 şlam daşımış və həmin ərazilərə 165 min 264 m3 ştib, 297 min 845 m3 isə torpaq daşınaraq yayılmışdır. Bu müddətdə 78 hektardan çox sahə çirklənmədən təmizlənmişdir.
2011-ci ildə də TRD-nin fəaliyyət sahələrindən olan yaşıllıqların salınması və bitkilərə aqrotexniki xidmətlərin göstərilməsi işləri də yüksək səviyyədə təşkil olunmuşdur. Cari ilin 7 ayı ərzində TRD-nin 1-ci və 3-cü sahələri ( yaşıllaşdırma üzrə) “Bibiheybətneft” NQÇİ-nin, “Abşeronneft” NQÇİ-nin və H,Z,Tağıyev adına NQÇİ-nin landşaftı bərpa edilmiş layihə ərazilərində, eləcə də, ARDNŞ-nin Qaz Emalı Zavodunun və A-4 Zığ sahələrində 104 min 980 ədəd ağac, bəzək və gül kollarına aqrotexniki xidmət göstərmişdir. Sahələr alaq otlarından təmizlənmiş, bitkilərin dibləri vaxtlı-vaxtında boşaldılmış, suvarılmış, üzvi və qeyri üzvi gübrələrlə təmin edilmişdir. Həmin sahələrdə, xüsusilə yay mövsümündə bitkilərin mühafizəsi üçün kompleks tədbirlər həyata keçirilmişdir. Su təchizatının yaxşılaşdırılması üçün sahələrə plastik boru vasitəsilə 4 min metrə qədər yeni su xətti çəkilmişdir.
QSC-nin Torpaqların Rekultivasiyası Departamenti mövcud layihələr üzrə fəaliyyətini yüksək ahənglə davam etdirir.
tarix : 08.08.2011
|